Shillong, Nailur 30: Ka khubor ba la ïoh na ki pulit ka nongbah Shillong, ki la ïathuh ba ha ka mied jong ka Sngi u Blei, ki la ïoh ban kurup ïa ki tiar tuh ha kaba ïadei bad ka case kaba la rejistar Case hapoh ka Rynjah Police Station kaba dangshen.
Shuh shuh ki pulit ki la ïathuh ba ïa kitei ki tiar tuh la lap na Saw Furlong bad ki pulit jong ka Nongmensong Outpost ki la leit mardor sha katei ka jaka ba don kitei ki tiar tuh ban ïoh ruh ban kurup noh ïa ki.
Ha kaba ïadei bad kane ha ka jingtohkit, ki Pulit kila lap ruh ïa kawei ka trok 6 shaka kaba don u AS01CC 3985 kaba la thep lang bad ki mar jot mar pei kiba dei ki tiar tuh, ong u Superintendent of Police ka East Khasi Hills u Bah Sylvester Nongtnger ha ka kyrwoh khubor.
Ki tiar kiba la ïoh ban kurup ki kynthup 10 unit ki Beam Web Assembly, 32 Unit ki Shuttering Jack, 1 ka mobile phone bad ka sim card.
Ha kaba ïadei bad kane ki pulit ki la kurup ruh ïa ka taksi kamai kaba don u nombar ML 05K 7554 ha kaba ïadei bad katei ka jingjia.
Na ka liang u SP u la pyntip ba ha kawei pat ka bynta, la lap ksai ha kaba ïadei bad kawei pat ka case jong ka Sadar Police Station, lyngba ka jingïoh kurup ïa ka kali na Imphal, Manipur.
Katei ka jingjia ka la mih lyngba ka jingujor ejahar pyrshah ïa u Mohammad Fareed, uba shong ha Barapathar Mawbah, Shillong ha kaba u nongujor ula kynnoh ba u Fareed ula pynbor ïa u ban long u ‘Guarantor’ ne Nongbahkhlieh ha ka jingthied ïa ka kali Maruti Suzuki Eeco 5 STR, khlem da pynpaw ba ïa katei ka kali yn shim ha ka kyrteng jong utei u nongujor kaba la pynlong ïa u ban hap ban siew ïa ka jingshim ram.
Lyngba ka jingtohkit kaba khlem shongthait, la lapksai ïa katei ka kali bad la wanrah noh biang ïa ka sha nongbah Shillong.
Ka jingtohkit halor kitei ki ar tylli ki jingjia ka dang ïaid shakhmat ban khmih bniah ïa ki jingshisha bad ïa ka jinglong jingman baroh, la ïathuh u SP ha ka kyrwoh khubor ha ka sngi Nyngkong.
