Shillong, Nailur 30: Ki pulit ka nongbah ki la ïathuh ba Head Teacher jong ka Oakland LP School, Shillong la phah ka jingujor ba ha ka 26 tarik mynta u bnai ha ka por kumba 9 baje mynstep ki runar bym lah ban ithuh ki la tuh ïa ki tiar shet jingshet bad kiwei kiwei ki tiar kiba shongdor kumba T. 8,700/- napoh ka skul.
Ha kawei pat ka jingjia ki pulit ki la ïathuh ba uwei u nongshong shnong ka nongbah Shillong u la phah ka jingujor ba ha ka 10 tarik mynta u bnai u la ïohpdiang ïa kiba bun ki jingshah phone ha kaba utei uba phone u la pynithuh ïalade kum u trai jong ka JC Construction Company bad u la pyntip ïa u, ba u paralok jong u, u don ha hospital bad kumjuh ruh u la thok ka pisa kumba T. 3 lak.
Shuh shuh na ka liang ki pulit ki la ïathuh ba u Bah Wankit Kupar Shylla u la phah ka jingujor ba ha ka 24 tarik mynta u bnai ha ka por kumba 5.30 baje janmied, ki runar bym lah ban ithuh ki la tuh ïa kawei ka Remote Radio Unit (RRU) kaba shongdor kumba T. 2 lak napoh ka jaka ba la pynïeng ïa u tower kaba ha shnong Mawblei, Shillong.
