Yn pynlong ka DSWO ïa ka AC na ka bynta ki briew ba duna ki dkhot met bad ka jingpynthymmai ïa u UDID

Mawkyrwat, ‘Nailar 08: Ka ophis jong u District Social Welfare Officer (DSWO), South West Khasi Hills District, Mawkyrwat u la ai ïa ka jingpynbna paidbah ba kane ka ophis kan pynlong ïa ka Assessment Camp (AC) na ka bynta ban peit ïa ki briew ba don jingduna ha ki dkhot met bad ban pynthymmai ïa u Unique Disability ID (UDID) jong ka Mawkyrwat C&RD Block, South West Khasi Hills District.
Ïa kane ka Assessment Camp (AC) yn pynlong ha ryngkat ka jingïatreilang bad ka District Resource Centre on Disability Affairs, Civil Hospital Nongstoiñ, West Khasi Hills Nongstoiñ ba la bei pisa da ka ophis jong ka State Resource Centre on Disability Affairs, Civil Hospital Shillong ha ka 10 tarik jong u bnai ‘Nailar, 2023 ha Civil Hospital Mawkyrwat naduh ka por 10 baje mynstep kan don ka Assessment Camp bad ban pynthymmai ne Renew ïa u Unique Disability ID (UDID).
Lah ban kdew ruh ba na ka liang, ka ophis jong u Deputy Commissioner, South West Khasi Hills District Mawkyrwat, u la ai ïa ka jingpynbna kaba wan lyngba u Principal Secretary jong ka Sorkar Meghalaya, Social Welfare Department, ha kaba la pyntip ba na ka bynta ban pynrung kyrteng ha u Unique Disability ID, ne u UDID Certificate bad ki kot kiba donkam ban rah ki long ka Voter’s ID/EPIC Card jong ka Meghalaya, ka Birth Certificate (na ka bynta kito ki nong-aplai kiba hapoh 18 snem), ka dur ne passport size bad ka Aadhaar Card.