Nongstoiñ, Nailar 8: Ka FKJGP Lai Lyngdoh area unit mynta ka sngi lyngba ka kyrwoh na u President Bah Nestor Nongkseh, ka pynrem jur halor ka jingshah thang ka kali dumper jong ka Company shna surok ha Mawthungkper ha ki riew runar riew shim kabu kiba ym pat lah ban tip ki dei mano.
“Ka seng ka pynpaw ïa ka jingsngew diaw bad ym lah ban pdiang ïa kum kane ka jingleh riew khlaw da lei lei ruh em hapoh ka thaiñ, namar kumba ngi ïohi mynta kane ka company ka dang pyntrei ïa ka surok kaba pynïasoh ïa ka Nongstoiñ sha Wahkaji. Hynrei, kane ka jingleh riew khlaw jong ki riew shim kabu ka wanrah pynban ïa ka jinglehraiñ ïa ka dong ka thaiñ”, ong ka kyrwoh.
“Lada kan ïai jia kumne ka lah ban wanrah ka jingthut ha ka jingtrei ïa ka surok bad ka jingduhnong ka long hi ïa ngi ki paidbah ba shong ba sah ha kane ka District. Ka seng ka kyntu ruh ïa ki bor aiñ ban wad ïa kine ki briew kiba leh ïa kane ka kam bad ban wad ïa ka daw, namar ka lah ban dei ki daw ba bun rukom la ki dei ki trai shnong ne ki briew kiba na ka company hi kiba leh ïa kane”, ong ka kyrwoh.
“Ka seng ka kyntu ruh ïa ki nongshong shnong ba lada ki lap ïa kano kano ka jingduna jong kane ka company, ba kin sngewbha ban leit mih ban ïakren bad pynbeit, khnang ba ki kam kin ïaid beit ïaid ryntih. Ka seng ka da thrang bha ba kane ka kam shna surok kan ïaid shait shait, khnang ba kan dep noh bad ba kan long ka jingkyrkhu ïa ki paidbah”, pynkut ka kyrwoh na u President.
