Ka mynsiem kaba shu kwah shisha tang ban im suk bam suk khlem da trei da ktah bad da khih da ksar ki kti ki kjat ne ka met ka phad ka la ïoh ba kan shong kulai bha ha ka jingmut kiba bun ki khun samla jong kane ka jylla, kaba kim tieng kim smiej shuh ïano ïano ruh, pynban beit beit ki kloi ban im ka jingim ban shu tuh ban shu lute. Ha ki samla ba leh ïa kane ka jait kam, kim don jingsngew eiei, hynrei ha u paidbah salonsar, kidei ki dak ki shin kiba kin sdang ban tieng bad ban khaweit, namar lada ïai bteng ban jyllei sah kum kine ki jait kam naki khun samla, ka lawei jong ka jylla ka don shisha hapdeng ka jingma kaba khraw.
Ym lah khlem da ïaroh ia ki bor pulit, kiba marsien ïa sdang ban lap ksai ïa kum kane ka jingmut ban shu tuh ban shu lute, ki la trei sted ban ïoh ban kem, ïa kum kine ki samla, kaba da kylla ka wanrah pat ïa ka mynsiem shaniah,kaba sngew shngaiñ pat u paidbah ha ka rukom ban trei kam jong ki pulit kane ka jylla.
Hynrei sa katno pat ka mynsiem ban shu bam suk, kaba jaipdeh ka kti ka kjat, ka jingmut ka jingpyrkhat ka la ïoh ba kan shong kulai ha kiba bun ki khun samla, ha kaba nangno kum kane ka mynsiem ka la wan ba kan rung syndon haki, kane ka dei ka jubab kaba baroh broh ki kwah ban ïoh ïaka.
Hynrei ban jubab ïa kane ka long ba ha ka jingim ki khun samla, dei ka rongphong pyrthei kaba la wan ba kan kah dum bha ha ka jingim ka jong ki, kim ïohi eiei shuh ka khmat ka jong ki, pynban kaei kaba ki ïohi ka long beit ki har rukom ki rongphong kiba la pynthame ne ban pynbyrie ïaka khmat kiba bun ki khun samla, kaba lada kim lah ban ïoh ïa kei kaba ki kwah, beit beit ka jingmut ka jong ki ka lam beit sha ka jingim ban shu thok, tuh bad lute.
Ka jingeh ba ka jylla ka sdang ba kan ïa kynduh mynta ka long ba ki aiñ ki kanun kiba la don lypa mynta, kim pat lah than eh ban da ai ïaka jingsneng kaba tyngeh, hynrei kaei kaba jia pat ka long ba hapoh ki khyndiat bnai haba shong ha phatok, ha ka jaka ba kan pynkylla ïaka jingim ki samla, kylla pynban kum ka kynja karkhana kaba mar sien ïa lait, ka khring biang ïa ki samla ba la ngop ban leh ïaka juh pat ka kam.
Kum kine ki jingjia, bunsien la bteng ban kem ruh biang ïa ki Pulit, hynrei ka jubab kaba mih ka long ba ha kum kine ki briew, kiba la sdang ban im ka jingim ba la shah tait na ka imlang ka sahlang, kim tieng kim salia, shuh, hynrei ki shang ki krih man la ki shong ki thaw, ki lynti ki syngkien, namar ba ha ki, shisien ba ki la ngop ha ka tuh ka thiem bad ka lute, ka jingmut ka jong ki kam kwah shuh ban kylla dien trai biang sha ka jingim kaba bha, hynrei, la shuh kah dum beit tang da u lyoh katba dang im, dei beit ban shu im ka jingim ban shu tuh ban shu thiem ne ban lute beit naphang lin katba ïoh ban kner ka kti.
Dei ka jingïai kha roi kum kine ki jait kam, ba ka pynshong syier bha ruh ïaka shnong ka thaw, kaba ha ki lynti ba kyndong kynshrot, kine ki jait briew, ki kylla long beit la kum ki mrad kiba khlem ïoh bam la slem bha, bad haba wan ban mihpaw ki para mrad ba rit bor, puk ki ñiom tyngeh ban kurup ïaka ban ban bam shngiam beit shipor ban pynkang ïala ka jong ka kpoh.
Kumta ïa kum kane ka mat, la donkam ban thaw ruh ïa ki lad ki lynti ban lah ha kaban pynkiar ïa kiwei pat ki khun samla ban nym ngop ne ban shah phon shah pah ha kum kane ka jait jingim, pynban hap ban plié lad ruh ïala ki samla, ba kin lah ban im ka jingim kaba kin ïeng hala ki jong ki kjat, donkam ruh ban bteng ha kaban pynlong ïa ki prokram ïa syllok ha man la ki shong ki thaw, donkam ban ailad ïa ki ban plié ïa ki jait rynsan ne ki lympung kiba har rukom, khnang ba u samla ba don ïa kano ma kano ka sap dei ban pynshlur ne ban btin lynti pat ia u ba un nym pynlehnohei ïaka.
Ka jingeh kaba ïa kynduh ïa kiba bun ki samla, ka dei ka bym lah ban ïoh kam ïoh jam, kaba la kha roi pat ïa kiba bun ki jingsniew ha ka imlang ka sahlang hi baroh kawei. Hap ban kynmmaw ba ka por samla ka dei ruh ka por, kaba ka snam ha ka met ka dang khluit bad ka jingmut ka jingpyrkhat ruh ka dang kham tlot, kumta, haba ki samla ki shah pynbiej, kim tip ïa kaei kaba kin leh, hynrei hapdeng ka jingshongshit bad khlem da pyrkhat jngai bha ïa kaei pat ka ban sa jia, pluk ngat keiñ ha ki jait kam kaba na madan ha madan ka pynsah jit pat shi rta jingim.
Kumta, ka por ka long kaba donkam ban lah ha ka ban mir jingmut bha bad ki khun samla, khmtam kiba la sdang ban kynjoh ïa ka rta kaba Khadhynriew snem shaneng, namar ha kum kane ka rta, ka shong ka thaw ka lynguh hi pum, namar ba la snam ki samla ka dang khluit bha, nalor kata ki shah pynngop ruh wat ha ki har rukom ki jingdih ba pynbuaid, kaba nang shoh tyndep shuh shuh i aka jingmuit ba dang lung ka jong ki, ha kaba kut, da ka jingshongshot bad kynshoit da mano re, poi pat sha ki jait kam pyntriem kaba ka imlang ka sahlang, ka shong ka thaw kam lah ban khlem da her syrngiew haba ïohsngew, ka ïing ka sem ruh baroh kawei ka poi pat sha ka jah nam ka jah burom, namar jia ryngkhat ba la kum khei ïoh shisha ïa ki khun tamsneng.
