Nongpoh, Naitung 08: U Deputy Commissioner, ka Ri Bhoi District u la pyntip sha ki paidbah ba ka Ri-Bhoi District ka long kawei napdeng ki 112 tylli ki Aspirational District ha ka Ri ban ïadon bynta lang bad ka Sampoornata Abhiyan, ka jingïalap kaba lai bnai kaban long naduh ka 1 tarik Naitung 2024 haduh ka 30 tarik Nailur 2024 ban pynlait paidbah da ka NITI Aayog katba ha Ri Bhoi District ka Sampoornata Abhiyan yn pynlait paidbah ha ka 9 tarik Nailar 2024 ha Circuit House Nongpoh.
Ha kane ka jingplie paidbah, u Adviser jong ka NITI Aayog ka sorkar India un wan ban don bynta lang ha katei ka sngi.
Ka Sampoornata Abhiyan ka dei ka prokram ba la shna kyrpang ban pynleit jingmut hakir ki mat ba kongsan jong ka jingtreikam ka sorkar kum ka koit ka khiah, ka rep ka riang, ka pule puthi bad kiwei kiwei.
Nalor katei ka prokram pyllait paidbah, ka Ri Bhoi Aspirational District bad ka Aspirational Block kin don ruh ki prokram bapher bapher kum ka dak ka jingplie paidbah.
