Shillong, Jylliew 21: Ka jingai jinghikai kaba 25 sngi halor ka phang “Design Intervention And Identification Of Forest Produce/Waste Material For Making Of Handicraft Jewelry And Utility Items” kaba dei ka jingsdang kaba kongsan da ka Directorate of Commerce & Industries, Shillong hapoh ka ‘The Handicraft Promotion Scheme’ la plie ha ka sngi Palei hapoh ka ophis jong u General Manager, District Commerce & Industries, Shillong.
Ha kane ka prokram la donlang u I. Z Wreang, Deputy Director, DCI, Shillong, u A. Malngiang, GM, DCIC, Shillong, founder/designer jong ka Neera Sarmah Foundation, ka Neera Moni Sarmah. Kane ka prokram ka thmu ban pynkupbor ïa kiba shah hikai da ki sap ki buit kiba donkam bad kumjuh ka jingshemphang ban pynmih ïa ki jingshna ïa ki mawkordor bad kiwei ki tiar kiba lah ban shna da ki seij bad ki tiar na ki khlaw kiba ym pyndonkam shuh. Ka jinghikai ka pan ruh ïa ka jingdonkam ban pynkylla ïa ki tyllong kiba don bad ki ban lah ban pynmih pisa bad sengkam lajong na ka bynta ki samla khlem kam khlem jam ha nongkyndong bad ha ki thaiñ Sor da ka jingpynlut kaba rit.
Ha ka sngi plie la don ki ophisar jong ka DCIC, Shillong bad kiba shah hikai kiba la shah jied. U Bah A. Malngiang, GM, DCIC, Shillong u la batai ha ka jingïalang ïa ka jingthmu, nangta kiba bun ki bynta bad ki jingmyntoi ba kiba shah hikai ki lah ban ïoh na kine ki jingshah hikai. U Kongsan u I.Z Wreang u la banjur ïa ka jingdonkam jong ki seij kum ki mar rep kiba lah ban pdiang kiba long eco-friendly kiba don shibun ha kane ka thaiñ bad u la kyntu ïa baroh ba kin leit sha ki prokram ai jinghikai da ka jingaiti, ka mynsiem kaba shitrhem bad ka jingmut kaba ïar bad banjur ba kane ka prokram ai jinghkai kan long ka jingkhang kaba plie na ka bynta ka lad aikam.
Katkum ka program instructor ka Neera M. Sarmah ka la sam ïa ki jingshem phang, ki jingïaid lynti na ka kam muktiar ba kan shah khot kum ka “Bamboo Lady”. Ka la sam ruh ïa ka Mantra jong ka kaba ong “One Bamboo, One Lakh” ban pynshlur ïa kiba leit shah hikai ban don ka jingshitrhem ban shna ïa ki mawkordor da ki seij naba kan long ka lad aikam ban pynïaid ïew ruh ïa u seij khamtam ki mawkordor ba la shna na u, khamtam ïa ki nongwan jngohkai kiba wan sha ka jylla. La pyni ruh ha kane ka sngi ïa kiba bun ki tiar kiba la dep bad ba la shna da ka Neera Creations team.
Ha kane ka sngi kaba pynkut, ki nongpynïaid ki la pynpaw ïa ka jingai khublei ïa ka kynhun jong ka Neera Sarmah ba ki la sam ïa ki jingtip jong ki bad ki buit da ki jingaiti bad shitrhem bad na ka bynta ka jingplie lad hapoh ka ïew ka hat ïa ki tiar ba la shna da kiba la shah hikai. Manla kiba la shah hikai ki ïoh ki tiar ne ki tool kits ban sdang ïa ki kam bathymmai jong ki na la ki jong ki ïing.
