Kyrpad u Bah Sanbor ïa u Lat ka jylla ban kren sha ka Sorkar Pdeng ban kyntiew ïa ka Red Cross Hospital

Shillong, Jylliew 21: U MLA ka BJP na South Shillong u Bah Sanbor Shullai u la kyrpad ïa ka jingtuklar jong u Lat ka jylla u Phagu Chauhan ban ïakren bad ka Sorkar Pdeng ban kyntiew ïa ka Lady Kerr Welfare Centre (Red Cross Hospital), Shillong lyngba ki lad pynroi.
“Nga kyrpad ïa phi ba phin shim khia lem khnang ba kane ka project kan lah ban ïaid shakhmat ba phin phah lem ka khubor sha ka Ministry of Doner lyngba ka Planning Department, ka sorkar jylla ba kan pyrkhat kham kloi katba lah ban ïoh ka jingmang pisa ha ka por kaba biang,” ong u Bah Shullai ha ka dorkhas kaba u la aiti sha u Chauhan ha ka jingïalang kaba la long ha Raj Bhavan ha ka sngi Thohdieng.
U Bah Shullai u la ïathuh ba ka Lady Kerr Welfare Centre, kaba hapdeng ka nongbah Shillong, ka dei healthcare centre kaba la ïoh ka jingshaniah ha ki nongshong shnong bad kiwei pat ki paidbah ba kin lah ban leit phah sumar ha kane ka jaka sumar kaba la ïaid mynta da kiba bun ki phew snem.
Hynrei kane ka Lady Kerr Welfare centre complex kaba don mynta ha Laban la pyndonkam da ka IRCS bad ka Lady Kerr Welfare naduh ka snem 1920, bad ka jingtei kaba la palat 100 snem ka la long kaba la rim bha bad kaba la sniew bad kaba ym lah shuh ruh tang ban shu maramot.
U la ong ban pynlong ïa kane ka complex kaba biang nadong shadong ha ryngkat bad ki tiar kiba long katkum ka juk kaba mynta ka la donkam ban pynthymmai baroh kawei ka complex da ki jingtei katkum ka juk kaba mynta kaba kynthup ruh ïa ka jingbuh ïa ki blood bank bad kiwei ki jingdonkam.
“Haba ïaid lang katkum ki rukom pynïaid kam jong ka International Red Cross bad Red Crescent Movement, kane ka complex ka la treikam khlem shong thait ban ai mynsiem, ban pynshlur bad sdang ïa baroh ki kam jong ka longbriew manbriew, kumta ka donkam ban shim khia khnang ba kan pynduna ïa ka jingeh ki briew, ban pynsuk bad wat ban ïada, bad kan long ruh kum ka sawdong sawkun na ka bynta ka jingsuk,” ong u Bah Sanbor.
“Ha ka ban pynïaid beit ïa ki jingïohi jngai jong kane ka skhim bad na ka bynta ka bha ka miat jong ka imlang sahlang ha ka nongbah, bad kaba don ruh ïa ki healthcare service jong ka, ka sorkar ka la tyrwa ban pynbha ïa ki jingtei hapoh kane ka Lady Kerr Welfare Centre (Red Cross Hospital), Laban, Shillong da ka thong kaba kyrpang jong ka jingbuh ïa ka Maternity and Child care,” u la bynrap.