Delhi, Nailur 24 : Ka Tnat Housing and Urban Affairs (MoHUA) jong ka Sorkar India kan pynlong ïa ka India Smart Cities Conclave 2023 ha ka Brilliant Convention Centre ha Indore, Madhya Pradesh ha ka 26-27 tarik u Nailur 2023.
Ha kane ka Conclave yn wan ïashim bynta da 100 tylli ki smart city kiba ïalam lynti ha ka jingkylla kaba khraw ha ka jingtei ïa ki nongbah lyngba ki jingsaiñdur thymmai. Kane ka prokram kan ai ka rynsan ïa ki nongbah ba kin pyni ia ki kam ba ki la leh hapoh ka Mission ban pynskhem ïa ka rukom treikam na ka bynta ki jingkylla ha ka ri na ka bynta ka lawei.
Ka President, ka Droupadi Murmu kan pynkup burom ïa ki nongjop ha kane ka bynta kaba saw jong ka India Smart Cities Award Contest (ISAC) 2022 ha ka 27 tarik u Nailur 2023. Ka ISAC ka dei kaba pynlong hapoh ka Smart Cities Mission hapoh ka tnat Housing and Urban Affairs jong ka Sorkar India naduh u snem 2018. Kane ka dei kawei na ki kam ba kongsan ba la sdang hapoh ka Mission, ha kaba ki rukom treikam ba plie lad, ki projek bad ki jingthmu ki dei kiba ïoh jingithuh lyngba ka jingpynkup burom namar ka rukom treikam kaba bha, kaba plie lad ïa kiwei kiwei ba kin ïoh jingnang jingstad bad ruh ban pynsaphriang ïa ki rukom treikam ba biang tam.
Ka Conclave kan don ruh ka jingïashim bynta jong ki kynrem ki lyndan kiba kynthup ïa u Mangubhai C. Patel, Lat ka jylla Madhya Pradesh, u Hardeep Singh Puri, Myntri ka tnat Housing & Urban Affairs, u Shivraj Singh Chouhan, Myntri Rangbah ka jylla Madhya Pradesh, u Bhupendra Yadav Myntri Sorkar Pdeng ba dei khmih ia ki tnat Labour and Employment, Environment, Forest and Climate Change, u AshwiniVaishnaw Myntri Sorkar Pdeng ba dei khmih ia ki tnat Information Technology, Communications, Railways, u Kaushal Kishore, Myntri Khynnah ka tnat Housing & Urban Affairs bad u Bhupendra Singh, Myntri Sorkar Madhya Pradesh ba dei khmih ïa ka tnat Urban Development.
Ha ryngkat ki ophisar na ka tnat Madhya Pradesh, ki Mayor bad ki Commissioner jong baroh 100 tylli ki smart city, ki nongïatreilang ha ki kam bad ki nongmihkhmat na ka imlang
sahlang kiba ïadei bad ka Smart Cities Mission kin wan ïashim bynta lang.
Kane ka prokram kan dei kaba ar sngi: 26 bad 27 tarik u Nailur 2023. Ka Sngi ba Nyngkong jong ka conclave kan don ruh ka jingplie ïa ka Exhibition kaba pyni ïa ki projek kiba jop hapoh ka ISAC 2022 bad ki nongbah, ki jingïakren bad ki Chief Executive Officer (CEO) jong ki smart city bad ka jingleit peit ïa ki jaka pyntrei ïa ki projek hapoh ka Smart Cities Mission ha Indore bad
Ujjain.
Ka Sngi ba Ar ka dei ka ban peit bniah ïa ka jingsam ïa ki khusnam ISAC 2022 da ka kongsan ha kaba 5 tylli ki Jylla/UT bad 31 tylli ki nongbah ba kyrpang bad 7 tylli ki kynhun ba ïatreilang kin ïoh ïa ki khusnam. Ki don 66 ngut ki nongjop ïa ki khusnam ISAC . Shuh shuh, ka Smart Cities Mission kan pyllait saw tylli ki kaiphod kiba long ka ISAC 2022 award compendium, Report by UN Habitat: Smart Cities Mission – Localizing Sustainable Development Goals, Compendium of Newsletters of SCM and ISAC 2023 award pamphlet ha kane ka conclave. Hadien kane baroh, ki Chief Executive Officer (CEO) jong ki nongbah kiba jop khusnam kin batai ïa ki jingshem jong ki. Yn pynkut ïa ka sngi da ka prokram pyni ïa ka deiriti.
ïa ka Smart Cities Mission la sdang ha ka 25 tarik u Jylliew 2015, da ka jingthmu ban pynbiang ïa ki jingdon jingem, ka jinglong jingman kaba khuid bad ka rukom im kaba biang na ka bynta ki nongshong shnong lyngba ka jingpyntreikam ïa ki ‘smart solution’. Ka dei ka mission na ka bynta ka jingkylla kaba thmu ban don ka jingkylla kaba khraw ha ka rukom tei ïa ki nongbah ha ka ri. Haduh mynta palat 6,000 tylli ki projek kiba kot palat T 1.1 lak klur ki dei kiba la pyndep bad ïa ki projek ba dang sah yn pyndep shuwa ka 30 tarik u Jylliew 2024.
U mawmer ba kongsan ba la kot ha kane ka Mission ka dei ki Integrated Command and Control Center (ICCC) kiba treikam ha baroh 100 tylli ki Smart City. Kine ki ICCC ki long kum ki jaka pdeng jong ki kam ha ki nongbah ha kaba la pyndonkam ïa ka teknoloji ban pynïaid ïa ki kam. Ki jingshakri ha ki nongbah ki la kiew bha ha ki kam bapher bapher kum ka jingbuddien ïa ki kam beaiñ, ka jingshngaiñ jong ki nongshong shnong, ka jingpynïaid ïa ki lad ka leit ka wan, ka jingpynkhuid ïa ki jaboh, ka jingpynbiang ïa ka um bad ka jingpeit ïa ki jinglyngshop ka mariang ha ryngkat kiwei kiwei ki kam.
100 tylli ki Smart City ki la pyntreikam ïa ki projek bapher bapher kiba ïadei bad ka leit ka wan, ka bording, ka um, ka jingkhuid, ki jaka paidbah kiba itynnad, ki jingdon jingem ha ka imlang sahlang, ki jingshakri ka Sorkar bad kiwei kiwei. Kum ban shu kdew, ha ki kam kiba ïadei bad ka leit ka wan, 1,192 tylli ki projek kiba kot sha ka T 24,265 klur ki dei kiba la pyndep bad sa 494 project kiba kot sha ka T 16,905 klur ki dei kiba dang ïaid shakhmat mynta. Ha kaba ïadei bad ka bording, 573 tylli ki projek ki dei kiba la pyndep bad 94 tylli ki dei kiba dang ïaid shakhmat. Ha kaba ïadei bad ka Water Supply, Sanitation and Hygiene (WASH) la pyndep palat 1,162 tylli ki projek kiba kot sha ka T 34,751 klur bad sa 333 tylli ki projek kiba kot sha ka T 18,716 klur ki dang ïaid shakhmat. 100 tylli ki smart city ki la tei palat 1,063 tylli ki jaka paidbah kiba kot sha ka T 6,403 klur bad sa 260 tylli ki projek kiba kot sha ka T 5,470 klur ki dei kiba dang ïaid shakhmat. Shuh shuh, 180 tylli ki projek kiba pyntreikam ha ka rukom Public Private Partnership (PPP) kiba kot sha ka T 8,228 klur ki dei kiba la pyndep bad sa 27 tylli ki dei kiba dang ïaid shakhmat. La pyndep 652 tylli ki projek kiba ïadei bad ki jingdon jingem ha ka ïoh ka kot kum ka jingpynbha ïa ki jaka shong ïew bad ki start-up incubation center bad sa 267 tylli ki projek ki dei kiba dang ïaid shakhmat. Ha kaba ïadei bad ki jingdon jingem ha ka imlang sahlang (ka koit ka khiah, ka pule puthi, ki ïing sah briew bad kiwei kiwei), la pyndep 679 tylli ki projek katba 153 tylli ki dei kiba dang ïaid shakhmat.
Ha ki por ba la dep, la pynlong lai bynta ka ISAC ha u snem 2018, 2019 bad 2020. Ka ISAC ka ai jingithuh ïa ki nongbah, ki projek bad ki jingsaiñdur thymmai kiba kyntiew ïa ka roi ka par kaba ïaineh ha 100 tylli ki smart city, bad kiba kyntiew ruh ïa ki nongbah kiba pdiang ïa baroh, kiba ryntih, kiba shngaiñ bad kiba koit ba khiah kiba kyntiew ïa ka rukom im jong baroh. ïa ka bynta kaba saw jong ka ISAC la plie paidbah ha u Iaiong 2022 ha ka prokram ‘Smart Cities-Smart Urbanization’ ha Surat. Ka jingai khusnam ISAC 2022 ka la don ka jingai kyrteng kaba ar bynta kaba kynthup ïa ka bynta ‘Qualifying’, ha kaba la peit ïa ka rukom treikam ka nongbah, bad ka bynta ‘Proposal’ ha kaba ki smart city ki la ai jingmut jong ki na ka bynta ki hynriew tylli ki thup khusnam kiba kynthup: Project Awards: 10 tylli ki phang, Innovation Awards: 2 tylli ki phang, City Awards: 2 tylli ki phang: National bad Zonal State Awards, UT Award, bad Partners Awards, 3 tylli ki phang.
La ïoh 845 tylli ki jingai jingmut na ka bynta ka ISAC 2022 na 80 tylli ki smart city kiba la ïoh ban ïashim bynta. ïa kine la peit ha ki san tylli ki bynta. Ha ka bynta kaba nyngkong, la leh ïa ka pre-screening jong ki 845 tylli ki jingai jingmut . 50% (423 tylli ki jingai jingmut) ki la poi sha ka bynta kaba ar. Ha ka bynta kaba ar, na ka bynta man ki thup, la jied ïa 12 tylli ki jingai jingmut kiba biang tam da ka kynhun ki nongbishar na ka National Institute of Urban Affairs (NIUA). Ha ka bynta kaba lai, kito kiba la shah jied ki la ai jingbatai ïa ka kynhun ki nongbishar bad la jied ïa hynriew tylli kiba biang tam. Ha kaba khatduh, ha ka bynta kaba saw, la ai jingbatai da ki hynriew tylli kiba shah jied hakhmat ka thup ki nongbishar ba longkhlieh da ki director ka tnat kaba kynthup ruh ïa ki riew shemphang kiba ïadei bad kine ki kam. Hadien ka bynta kaba saw, la jied ïa lai tylli ki jingai jingmut kiba biang tam ha man ka thup da ka Apex Committee of Smart Cities Mission. Na baroh 845 tylli ki jingai jingmut ba la ïoh ha ki san tylli ki thup jong ki khusnam, la jied ïa 66 ngut ki nongjop – 35 tylli ha ka Project Award, 6 tylli ha ka Innovation Award, 13 tylli ha ka National/Zonal City Award, 5 tylli ha ka State/UT Award bad 7 tylli ha ka Partner Award.
