Nongstoiñ, Nailur 11: Ka KSU West Khasi Hills District Unit lyngba ka Education Cell, kan pynkup burom ïa ki samla pule ba pass bha kaba yn ai nam da ka ‘Wickliffe Syiem Excellence Award’ sha ki Samla pule kiba wan Merit list ha ka SSLC, HSSLC, Degree bad Gold Medalists ha ka PG Degree, kiba pass na ki Board bad University bapher bapher jong u snem 2023.
Ha kaba ïadei bad kane, ka Seng kan sam ïa kane ka Khusnam tang ïa ki samla kiba dei na West Khasi Hills District bad Eastern West Khasi Hills District. Ka Seng KSU ka pynlong ïa kane ka jingpynkup burom, kum ka jingai mynsiem ïa ki dkhot ka Jaidbynriew kiba la wanrah burom ïa ka dong ka thaiñ lyngba ka jingpass bha jong ki ha ki eksamin ba la pynlong ha u snem 2023.
Ka KSU ka khot ba ki samla kiba ïoh merit list kin sngewbha ban phah ïa ki kot ki sla kata ka Marksheet bad ka Residential Certificate ha lane shuwa ka 23 Nailur 2023 lyngba kine ki WhatsApp number +918132094893/+918787795181. Kane ka long katkum ka kyrwoh na u Samla Banlumlang Nonglang Publicity Secretary KSU West Khasi Hills District Unit.
