Namar ka jingleh sting u kontraktor, hiar jurip ka KSU bad ki rangbah shnong ïa ka Surok Mawrap – Nongnam

Mawkyrwat, ‘Nailur 11: Ka Khasi Students Union (KSU) jong ka Mawkyrwat Circle ryngkat ka Synjuk ki Rangbah Shnong jong ki 8 tylli ki shnong mynta ka sngi ki la hiar jurip ïa ka surok PMGSY na Mawrap – Nongman kaba jngai 19.300m kaba hapoh ka jingïalam u bah Rutherford Lyngdoh, General Secretary ka KSU Mawkyrwat Circle.
Kane ka surok ka pynïasoh ïa ki 8 tylli ki shnong kata ka shnong Mawrap, Jerlang, Mawsaiñ, Nongman, Mawtangden, Mawkhyrwang, Mawbri bad Lumpyngngad.
Kane ka jinghiar jurip jong ka KSU ïa katei ka surok ka dei namar ka jinglehstieng bad ka jingsangeh trei jong u kontraktor la katto katne por. Namarkata, ka seng ka kyrpad ïa u kontraktor ba um dei ban leh stieng ïa la ka kam hynrei u dei ban pyndep ha ka por kaba biang namar ka surok kane ka surok ka dei kaba la slem naduh ki snem 2014 bad la sdang ban pyntrei ha u snem 2018. Shuh shuh ki la ong ruh ba kane ka surok ka dei kaba jngai tang 19.300m hynrei ka jingpyntrei pat ka dang long tang hapoh 50% hynrei mynta pat une u kontraktor u la sangeh khlem daw.
Namarkata, ki paidbah nongshong shnong ki la buh ka jingkyrpad na ka bynta u kontraktor ba u dei ban wan pyndep ïa la ka kam ha kaba katkum ka jingleit ïa kynduh ïa u Chief Engineer la ïoh jingtip ba ka jingpyntrei ka sah mynta sa tang 6 bnai. “Lada long kaba lah na ka liang ki bor sorkar kan sngewbha ban pynjlan ïa ka por namar kane ka surok haduh mynta kam pat shym la poi sha ka thong bad ka jingpyntrei ka dang long tang 6 km na ka 19.300m”, ong ki rangbah shnong.
U bah Pauldip Tongwah, President ka KSU Mawkyrwat Circle ha ka jingkren jong u la pynpaw ba kane kam dei shuh ka sien kaba nyngkong ha kaba ïa dei ba ka jingwan jurip ïa kane ka surok hynrei ka la dei man la ka por hynrei namar ka jingpat poi sha ka thong jong ka jingjop mynta ka sngi kum ka seng ryngkat ki rangbah shnong ki la wan biang ban jurip. “Katkum ka jingleit ban ïa kynduh ïa u Chief Engineer jong ka tnad PWD (R) la ïoh jingtip ba ka por jong ka jingpyntrei ïa kane ka surok ka sah mynta sa tang 6 bnai bad ka jingpyntrei pat tang haph 50%”, ong u ban Poldip.
U la ong ruh ba kane ka long kaei kaei kaba pyndiaw mynsiem na ka bynta ki paidbah nongshong shnong namar lyngba ki snem kiba la sdang ban pyntrei ki la don ka jingkhmih lynti ba ka ïaid ka ïeng jong ki kan sa pynsuk, hynrei kita ki jingkhmih lynti jong ki ki long da khongpong namar ka jingkheiñ-sting u kontraktor ha kaba u don ka aïom slap haduh phra bnai bad u trei tang saw bnai.
Kumta u la bynrap da kaba ong ba lada ki bor ba dei peit kum ka PWD (Roads) kaba shimti ïa kane ka surok ka ai lad ïa u kontraktor ba un leh katba mon kaba mut ba kine ki 6 bnai ki ban sa wan ruh kin shu kut kumto bad ym lah ban poi sha ka thong. “Lada kane ka surok kam poi sha ka thong ne ki paidbah kin ïoh pyndonkam kaba mut ba ki la shu wan ai sha khlaw – kam mut ba ai ha ki briew hynrei ai ha ki mrad”, u la ong.
Ha kawei pat ka liang u la ong ba ha ka jingjurip jong ka seng ïa kane ka surok ka jingpyntrei kam da long kaba bha hynrei u la shu ïa beh ban pyntrei bad ka long kaei kaei ka jingduh nong na ka bynta ki paidbah. Namarkata, ki la dawa na ki bor sorkar ba ka dei ban phah mardor ïa u kontraktor ba u dei ban wan pyndep ïa kaei kaba la bhah na ka bynta jong u namar ka por ka la long lyngkot.
Ha kane ka sngi la ïadonlang naduh u bah Forwardman Nongrem, President ka KSU South West Khasi Hills District, u bah Stebenstar Shylla, Myntri Shnong Nongnam, u bah Bipstar Lyngkhoi, Myntri Shnong Mawbri, u bah Sentarlan Mylliem, President KSU Nongnam-Mawkhyrwang Area Unit lem bad ki dkhot ka seng KSU.