Nongpoh, Naiwieng 02: Na ka bynta ban wan rah ia ka khuid ka suba hapoh ka shnong ka thaw bad ban hikai ruh sha ki paidbah halor ka jingdonkam ban wan rah ia ka khuid ka suba ha shnong ha thaw, ka Dorbar shnong Pahamsyiem, Nongpoh ka la rai ban pynlong da ka jingpynkhuid shnong paidbah ban sa shim bynta lang da baroh ki paidbah nongshong shnong.
Kane ka rai jong ka Dorbar Shnong Pahamsyiem ban pynlong ia ka jingpynkhuid shnong la rai ban pynlong ha ka 4 tarik u Naiwieng 2023 kaba sdang baduh ka por 8 baje mynstep bad ki nongshong shnong naduh ki nongshongwai, kiba don jaka bad ki nongshong shnong ki dei ban wan ban ai kyrteng naduh ka por 7.30 mynstep ha ïing Dorbar jong ka Shnong Pahamsyiem.
Na ka liang ka Dorbar shnong ka la kyrpad ba dei ban mih naduh ki nongshongwai, ki trai jak aba na shabar bad ruh man la kawei pa kawei ka longing ki hap ban ia mih ryntih bad kino kino kiba ym shim bynta ha kane ka jingpynkhuid shnong ka Dorbar Shnong kan leh katkum ki kyndon jong ka aiñ shnong.
