Nongpoh, Naitung 1: Ka tnad Cooperation jong ka sorkar jylla mynta ka sngi ka la plie paidbah ïa ka Cooperative Week 2026 ha Prime Hub, Umdihar, Ri Bhoi District, daka jingangnud ban pynkhlaiñ ïa ka bynta jong ki Cooperative Society ban kyntiew ïa ka ioh ka kot bad ka roi ka par ka jylla.
Ïa kane ka prokram la plie paidbah mynta ka sngi da u myntri ka tnad Cooperation, u Bah Methodius Dkhar, uba la long kum u kongsan haka jingdonlang u MLA ka Nongpoh, u Bah Mayralborn Syiem, u MLA ka Umsning, u Dr. C. Lyngdoh, ki heh ophisar sorkar, ki nongïalam shnong, ki nongmihkhmat jong ki Cooperative Society bad kiwei pat ki riew rangbah.
Ha kane ka sngi naka liang ka tnad ka la pynlait paidbah ïa ka e-Newsletter bad ka RCS Office Portal, ban pynsted, pynsuk bad pynshai ïa ki rukom treikam jong ka tnad katkum ka juk mynta.
La sam ruh ïa ki khusnam sha ki Cooperative Society kiba la leh bha ha ki kam jong ki kum ka jingithuh ïa ka jingnoh synñiang jong ki lyngba ka kam ba ki shakri. Nalor kata, la pynlong ruh ïa ka Health Camp bad la plie ïa ki stall bapher bapher ba la pyninam da ki Cooperative Society kiba ïashim bynta ha kane ka sngi.
Haba ai jingkren ha ka jingïalang, u Bah Methodius Dkhar u la ong ba la jied ïa Ri Bhoi ban pynlong ïa kane ka jingïalang kaba kyrpang namar ba ka dei ka Aspirational District, kaba la ïoh jingïarap kyrpang na ka sorkar pdeng ban pynkhlaiñ ïa ka roi ka par.
U Myntri u la ong ruh ba hapoh ka jingïalam jong u Myntri Rangbahduh ka Ri, ka jylla Meghalaya ka angnud ban pyndonkam ïa ki Cooperative Society kum ka lad ban kyntiew ïa ka ioh ka kot, ban thaw lad kamai bad ban pynroi ïa ki thaiñ nongkyndong.
