Shimti biang u Pa’iem Kawangbor Syiemiong kum u Syiem ba pura jong ka Hima Nobosohphoh Syiemship

Mawkyrwat, ‘Naitung 01: U Pa’iem Kawangbor Syiemiong, uba dei uwei na ki Syiem ba dei peit ïa ka Hima Nobosohphoh Syiemship baroh kawei u la wan shimti biang ïa ka jinglong syiem bapura hadien ba la shah suspend la kumba ar snem ei ei, bad hadien ba la pyndep ruh ïa ki jingpynbeit halor ki kynrum-kynram kiba la mih ha ka hima.
Ka jingshah suspend jong u Pa’iem Kawangbor Syiemiong ka la jia hadien ba ki rangbah ka hima ki la ujor sha ka District Council, kaba la rai ban suspend shipor ïa u ban ailad ïa ka jingtohkit bad ka jingpynbeit ïa ki jingïakajia baroh
Kumta dei tat ha kine ki khyndiat sngi, kata ha ka 26 tarik u Jylliew, 2026 ha ka shithi ba la soi da u Secretary sha ka Executive Committee jong ka Khasi Hills Autonomous District Council (KHADC) ka la pynmih ïa ka hukum ban pynphai biang ïa ka bor synshar sha u Pa’iem Kawangbor Syiemiong kum u Syiem ba pura jong ka Hima Nobosohphoh ha ryngkat ruh ki 20 tylli ki jingpynbna ïar hapoh ka Hima Nobosohphoh Syiemship baroh kawei.
Namarkata, halor kane ka kam mynta ka sngi, ka 1 tarik u ‘Naitung, 2026, u Syiem ryngkat bad ki Myntri bad ki Lyngdoh ka Hima, ha ryngkat ka donlang ki bor jong ka aiñ na ka tnad Pulit na Mawkyrwat, ki la plie paidbah biang ïa ka ophis treikam jong ka Hima, kum ka dak jong ka jingwanphai biang jong ka synshar khadar hapoh ka jingïalam jong u.
Kum ban shu pynkynmaw, naduh ba u Pa’iem Kawangbor Syiemiong u la shah suspend, ïa ki kam hapoh jong ka Hima baroh kawei la pynkit hapoh ka jingïalam ïa ka Hima sha u khun pyrsa jong u kum u Acting Syiem kata u bah Ferdinance Syiemïong, uba la pynïaid ïa ki kam ki jam jong ka Hima katkum ka riti dustur jong ka Hima Nobosohphoh.
Haba kren ki lad pathai khubor, u Pa’iem Kawangbor Syiemiong u la ai khublei na ka bynta ka Executive Committee jong ka Khasi Hills Autonomous District Council (KHADC) kaba hapoh ka jong ka VPP ha kaba ki la pyndep ïa baroh bad ai biang ïa ka bor ne pynkup bor biang ïa u kum u syiem bapura jong ka Hima Nobosohphoh. Ym tangkata, u la pynshai ruh ba ha kaba ïa dei bad ka file jingshah ujor ïa u ruh, kane ka EC ba thymmai ka dang shu ïoh pdiang na ka EC kaba rim bad u CEM u la kular ruh ba un sa leh ïa kaba donkam khnang ba ki kam baroh ki long kiba ïaid beit ïaid ryntih nangne shakhmat.
“Kumta, dei tat ha ka 26 tarik u Jylliew, 2026 ka Executive Committee jong ka Khasi Hills Autonomous District Council (KHADC) ka la pynkup bor biang ïa nga kum u Syiem bapura”, ong u Pa’iem Kawangbor Syiemiong. Ha kajuh ka por na ka liang jong u ruh u la pynpaw ka jingaikhublei ïa u CEM bad ka EC baroh kawei hapoh ka jingïalam jong ka VPP kaba la leh ïa ka kam ban wanrah jingbha.