Yn plie pyndonburom ka Seiñ Raij Tuber ïa u mot dur jong u Woh Tep Kyndait ha Tuber Kmaishnong
Khliehriat, Kyllalyngkot 15: Ka Seiñ Raij Tuber lyngba u kyrwoh ba la phah da u Rangbah Mansan, uba dei ruh u President, u bah R.Harvis Phawa bad u Rangbah Longsan, uba dei u General Secretary, u bah Jolby Sana, ki pyntip ba ka Seiñ Raij kan sa plie donburom ïa u mot dur (Statue) jong uwei na ki khlawait ka rilum Jaiñtia, u Woh Tep Kyrdait, uba dei ruh u MAR jong ka Raij Tuber, ïa kane ka prokram ba kyrpang yn pynlong ha ka 17 tarik u kyllalyngkot ha Tuber Kmaishnong hajan u Mot jong u Woh Tep ha ka por 10 baje mynstep.
Ha katei ka sngi jong ka 17 tarik, yn pyndon burom ruh ïa ka lyngkhuh sngi iap kaba 355 snem jong u woh Tep Kyndait uba la shah pyniap ha u Syiem ka Jaiñtia Pur ha ka 17 tarik, Iaïong ( Janaury) snem 1669
“U Woh Tep Kyndait, u dei u briew uba don burom, uba don ruh ka mynsiem ieid jaitbynriew, u dei ruh u ba shynrang mynsiem, uba don ruh ka mynsiem ba satar uba la ieng ialeh pyrshah ïa ki briew kiba wan na bar kiba la wan ban thom bor bad leh jubor ïa ka jait ka kynja, ïa ki khun ki raiot jong u kamjuh ïaka thaiñ pnar hi baroh kawei” ong u kyrwoh”
Na ka liang ka Seiñ Raij ka khot bad wer ïa baroh ki khun ka bri u Hynñiewtrep ban ïa wan lang ha katei ka sngi namar katei ka sngi kan dei ka sngi kaba khraw bad ba kyntang, ka sngi sah jingkynmaw ïa baroh ki khun ka Bri u Hynñiewtrep Hynñiewskum, ïa ki khun jong ka Raij Tuber.
U Symbud myntrei rangbah ka jylla, u bah Sñiawbhalang Dhar, un wan long kum u kongsan ha katei ka sngi bad u Symbud Kongsan, u bah Kyrmen Shylla, kin ïa don lang ruh ki myntri sorkar, kumjuh ruh u bah Wailadmiki Shylla uba dei u MLA 2- Jowai kum u Special Guest, u bah Lasky Rymbai Deputy Chief Executive Member jong ka JHADC, u bah Lakhon Dkhar, EM ka JHADC, u Dolloi Elaka Jowai, u ma Puramon Kynjing, Dolloi Elaka Shangpung, u Ma Chanki Langbang bad kiwei kiwei ki riew paw khmat jong ka ri lum Jaiñtia.
Ha katei ka sngi yn pynsngew ruh ia ka khana shaphang u Who Tep Kyndait.
Ka Sein Raij ka khot sngewbha ïa baroh khamtam ki Secretary, ki Chairman jong ki Seiñ Raij Shnong kiba hap hapoh ka Raij Tuber bad ka pam map ruh ba ka Seiñ Raij kam lah ban pynpoi da ki shithi khot sngewbha sha baroh.