Shillong, Ïaïong 24 : Kum shibynta ban kyntiew ïa ka Grassroots ha Ribhoi District, ka PFR Football Academy kaba long kawei ka Shlem ai jinghikai ha ka jingïalehkai football, kan plie ïa ka jaka ai jinghikai (Centre) jong ka hapoh Sumer Umbang Ri Bhoi District na ka bynta ki khynnah Kynthei bad Shynrang kiba naduh 4 snem ka rta haduh 18 snem.
Ka jingthmu jong kane ka Academy ban plie ïa ka Centre ha Ri Bhoi ka long halor ka nongrim ban ai ka jinghikai (Trainning) ïa ki khynnah katkum kane ka juk kaba mynta bad kumjuh ruh ban ai ïa ki ïa ka rynsan ïakehkai (Developmental league) kaba kynthup naduh ka Baby League, Youth League, Women’s League kumjuh ruh ki Tournament sha bar jylla.
Bad ïa kane ka Shlem ai jinghikai yn pynsdang naduh ka 13 tarik u Jymmang 2023, bad yn khmih ïa ki da u Amit kum u Head Coach, u Robin Nongrum bad u Raffel Rapsang kum ki Asst Coache. Kino kino ki khynnah Kynthei bad Shynrang kiba shong ba sah ha Ri Bhoi kiba kwah ban rung ha kane ka Academy ïa ka Offline Registration form lah ban ïoh Majaw store Nongpoh, Dukan Jason Nongrum Nongpoh, RJN Sports Umsning, Rimi Studio Sumer, Ochwa Fast food Sumer, Tyngshain Shop Bhoirymbong, bad Anju Veg Shop Lad Umsaw (NEPA).
Ka tarik ban pynpoi ïa ki form kan long ha ka 6/5/2023 bad la kyntu ïa kito baroh kiba lah ïoh ïa ka form ha ki bnai bala dep ba kin phah noh ha kitei ki dukan ba la kdew haneng.
