Shillong Rymphang, 27: Ka Sorkar Jylla kala pynpaw ïa ka jingsngewkhia halor ka jingjur palat ka jingpluh ïing namar ka jingthut ki wire bording elektrik bad kut jingmut ba kan leh eiei noh khnang ban lah tehlakam ïa kine ki jingjia.
ïa kane la pynpaw da u Myntri ka tnad Bording Abu Taher Mondal mynta ka Lah Sngi U Blei haba bynrap ba kam long ka ba suk ïa ka Tnad ban leit jngoh ïa ki lain bording ha man ki thliew ïing namar ki wire bording ki ïaid hapoh ïing.
Hynrei, ula ong ba ka Tnad ka don jingthmu ban leh noh da ka audit ïa ki wire bording jong ki ïingdieng ba la rim bha, kiba don ha nongbah Shillong.
Ula pan ïa ka jingïatreilang jong ki paidbah ba kin pyntip ïa ki jingsngewkhia ba ki don haba ïadei bad ki laiñ bording sha ka Tnad.
Ula kyntu ruh ïa ki paidbah ba kin phikir bha bad ban nym ailad ïa ka over loading ha ki ïing ki sem jong ki.“Lada don kaei kaei ba ïadei bad ka bording, ka Corporation kan pynbeit mar mar ïa ki khlem kano kano ka jingeh” ula bynrap.
Haba kylli ïa ki post elektrik ba sarang bad ki wire ba ïatakhuh ba la sakhi ha kylleng ki jaka jong ka Nongbah, ula ong ba ka Corporation kan sa bujli noh mardor ïa kine ki post elektrik haba don kano kano ka jingujor.
Lah ban kdew hangne ba ka ïingdieng ba palat 111 snem jong ka Shillong Bar Association ka la kylla dpei na ka jingbam duh ki thylliej ding, ïa kaba la suba jur ba dei na ka jingthut jong ki wire bording.
