Yn khot ïa baroh ki Nongïalam Niam ym dei ban pynlong jingïaseng duwai ban plie ïa ka University : Rakkam

Shillong, Kyllalyngkot 9 : U Myntri ka tnad pule puthi jongka jylla u Rakkam A Sangma u la ong ba ka sorkar kan khot ïa baroh ki nongïalam niam ban ïadon ryngkat ha ka jingplie ïa ka University ba nyngkong ba la seng da ka sorkar jylla ka Capt. Williamson Sangma ha ka 13 tarik Kyllalyngkot 2025.
U la pynbna ïa kane hadien ba la mih bun ki jingpyrshah ïa ka jingmih khubor kiba u ong ban pynlong da ka jingïaseng duwai ha ka jingplie ïa ka University. U la ong “ Ngam shym la ong ban pynlong da ka jingïaseng duwai hynrei ban khot ïa baroh ki Nongïalam Niam ban wan ïadon lang bad ai ka jingkyrkhu ïa ka University ba nyngkong eh jongka jylla. Ngam shym la mut ne ong kumtei hynrei la pynwan bakla ïa ka jingkren jong nga da ki lad pathai khubor”.
U la ong shuh shuh “ Nga tharai kam long kaba bakla ban khot ïa ki nongïalam niam ban ai jingkyrkhu ïa kane ka skulbah jong ki paidbah, ka jylla bad ka ri hi. Kane ka dei kaba nga mut hynrei ngam tip balei ki mih ki jingpyrshah jur hynrei kynmaw ba kane ka dei ka prokram jongka sorkar bad baroh la khot sngewbha ban ïadon lang naduh ki nongïalam niam bapher bapher Khristan bad ki bym dei Khristan bad kiwei kiwei.
U la ong ruh ba kane ka jingseng ïa kane ka University ka dei kawei na ki sienjam ba ka sorkar MDA ka la leh kam babha hapoh ka jingïalam u Myntri Rangbah ka jylla u Conrad K Sangma.
“ Ka sorkar MDA hapoh ka jingïalam jong u Myntri Rangbah u Conrad K Sangma ka la phai khmat bha sha ka pule puthi namar lada ym wanrah jingkylla ha ka pule puthi kiei kiei baroh kin ym don jingkyrmen. Mynta la bun kiba la dep ban leh hynrei dang bun ruh kiba yn dang dei ban leh ha ka tnad pule puthi ha ki por ban wan. Kumta hadien 52 tylli ki snem bad haba la mad ïa kiba bun ki jingeh ym dei tang ka CUET hynrei kiwei kiwei ruh ka sorkar hapoh ka jingïalam u Myntri Rangbah ka la rai ban seng noh ïa kane ka University bad kane ka dei ka rai kaba kongsan tam ba ka sorkar MDA ka la shim” ong u Rakkam.
U la ong nadong shadong yn pynlut da ka sorkar jylla bad shen yn sa sdang ban thung kam noh haduh 150 tylli ki post khnang ban ïoh sdang shwa ïa ki katto katne ki tnad pule ha kane ka snem ba mynta. Namar ba dang duna ki kamra Class kumta ym lah ban sdang shisien sdang hynrei na ka liang u Vice Chancellor un sa peit ban sdang shwa katto katne ki tnad pule naduh mynta u snem.