Yn khang ka sorkar ïa ki khyrdop lum khajna ki ADC lada kyrshan da ka aiñ, ïathuh u Bah Tynsong

Shillong, Jymmang 20: U Symbud Myntri Rangbah ka jylla uba khmih ïa ka tnat ki Kam Pohïing ka sorkar jylla u Bah Prestone Tynsong ha ka sngi baar u la ong ba ka sorkar jylla kan khang lut ïa baroh ki khyrdop lum khajna ba la buh bad pynïeng da ki autonomous district council (ADCs), lada ki long kiba la kyrshan da ka aiñ.
Haba kren sha ki lad pathai khubor u Bah Tynsong u la ong, “Kino kino ki khyrdop lum khajna ne ki khyrdop talasi kidei ban ïoh ki jingkyrshan da ka aiñ. Kidei ban don hapoh ki kyndon jong ka aiñ. Lada kim don kum kine ki aiñ ym lah ban leh eiei tang ban shu pynpra beit ne ban khang khyrdep ïa ki.”
Ha shwa kane, na ka liang ka Khasi Hills Autonomous District Council (KHADC) ka la ong ba ka jingleh ki bor pynïaid District ka Ri Bhoi ba ka la khang ïa ka khyrdop lum khajna ha Umdihar khlem da pyntip ne ai jingpynbna shwa ïa ki bor synshar ka council.
Ha kaba ïadei pat bad ka jingshah thang ki trok ka Star cement ha ka shnong Lumshnong kaba hab ha East Jaiñtia Hills, Tynsong u la ong ba ïa kane ka kam mynta la lah ban tehlakam.
“Na ka liang u SP bad DC ki la don ha ka kam, ngi la pynkhlaiñ ïa ki bor pahara bad nga kmen ba mynta kim don shuh ki jingjia bad nga thikna ba ha kine ki sngi baroh ki kam kin sa long kiba ïaid beit ïaid ryntih bad kan wan biang ka suk ka saiñ,” u la bynrap.
Kumba 15 tylli ki truck ki la shah thang hapoh Star Cement da ki paidbhur kiba la kiew jingdom ha ka mied sngi U Blei hadien ba uwei uba ñiah ïa ka pick-up truck u la khlad hashen hadien ba la shah tynrah ha kawei na ki trok jong kane ka company.