Ngi khlem tynneng ne pyrthuh bud ïano ïano ruh ngi hiar sha ïewduh ban jurip shwa ban ai ïa ka Song Pisa ba 15 klur : Paul

Shillong, Jymmang 20 : U Nongpathai khubor ka sorkar MDA uba dei ruh u Myntri jongka tnad kam jngohkai u bah Paul Lyngdoh u la ong ba ka jingleit ïuhkjat jong u Myntri Rangbah u Conrad K Sangma, u Symbud Myntri Rangbah bah Prestone Tynsong bad Ma u lem bad ki ophisar na ki tnad bapher bapher, u Syiem ka Hima Mylliem bad ki Myntri jongu ha ïewduh ha ka Lah Sngi U Blei kam dei satia ka jingtynneng ne pyrthuh bud ïa no re ïano hynrei ka dei ka jinghiar jurip ba kyrpang ïa ka ïewduh shwa ban aiti ïa ka song pisa ba 15 klur tyngka.
“ Ngi la dep ai shwa 6 klur bad ngi dang pynkhreh ban ai sa 15 klur ban pynbha bad pynitynnad shuh shuh ïa ka ïewduh, ka 15 klur tyngka ka dei ka pisa kaba la heh bha na kata ka daw shwa ban aiti sha ka Hima Mylliem donkam ban leit jurip kyrpang ban ïohi hangno ban pyntreikam ïa kane ka pisa. Hadien ba la dep ruh ngin leit jurip biang bad lada i hun bad dang i donkam ban ai shuh shuh ka sorkar kan dang ïai bteng ban ai lehse haduh ar lane lai shah ban pyni tynnad ïa kane ka ïew Tynrai kaba heh tam ha ka jylla namar ka thong ka long ba ngi kwah ban pynitynnad ïa kane ka ïewduh ba kan khring sa ïa ki nongwan jngohkai ban wan ruh shapoh jongka. Namar ki don ki jingtei ba don ki khana pateng, ka deiti bad jinglong tynrai jongka” ong u bah Paul.
U la ong shuh shuh “ Ngi hiar sha ïewduh ym dei shwa ka Election MDC hynrei hadien ba la kut ka election MDC bad dang jngai ka election MLA ruh. Kumta ban shu kynnoh ba ngi shu tynneng bad pyrthuh ïa kaei kaba leh kiwei kam don nongrim haei haei ruh. Ngi hiar sha ïewduh ryngkat bad ka song pisa ba 15 klur tyngka namar ngi dei ki briew kiba trei da ka kam ym kiba heh tang ka tyngam”.
“ Kiba heh tang ka tyngam katba ka kam da kumwei ki leh aiu? Ha ka por Election ki pyrta na ki rynsan ba lada ki jop kin weng lut ïa ki khyrdop lum khajna na ki surok bah ne surok shnong hynrei dang tang katto katne bnai ba don ha ka shuki ha KHADC la mih shwa kawei ka khyrdop lum khajna ne kata ka Trade Check Gate kumba ki ong ha Umdihar harud surok bah National High Way 6 ïa kaba la khang khyrdep noh da ki bor synshar District ka Ri Bhoi ha ka 16 tarik mynta u bnai” ong u bah Paul.
U la ong kane ka sorkar ka la leh bun kiei kiei ban wanrah ka jingkylla hapoh ka jylla. Lada phai naduh ka pule puthi, ka koit ka khiah, ki surok, ka kam jngohkai pyrthei, ka umbam umdih bad bun kiwei kiwei kiba ka sorkar ka la leh. Kumta u kyntu ïa ki paid nongshong shnong ruh ban bishar bniah bha ïa ki jingtreikam jongkane ka sorkar.Lada phai sha ka New Shillong ruh la bun bah ki jingkylla bad hapoh san snem kiba bun ki ophis khamtam ka Secretariat kin poi sha New Shillong namar ka jingtei ka la ïaid shaid shaid mynta. ïa ka Assembly ruh la jan dep, kumta u la ong kine ki dei ki kam kiba paw ba ka sorkar ka dei kaba trei shisha ym dei ba ka heh tang ka kular hynrei ka pynbun da ki kam ban ia ka ktien, ong u bah Paul.