Tura, Risaw, 25: U General Secretary jong ka Meghalaya Janata Dal (United) u Joshua Ch. Marak u la pyntip ba ka jingjied ïa ki kyrtong na ka bynta ban pynïakhun ha ka Elekshon sha ka Iingdorbar Thawaiñ ka jylla ka la ïaid shakhmat.
“Ngi la rai ban pynieng ki kyrtong ha baroh 60 tylli ki Constituency ka Jylla Meghalaya. Ki Kyrtong na kylleng ka jylla ki la wan pan tiket ha ki khyndiat bnai hynrei ka por kam pat dei ban shu ai tiket lymmuh. Hynrei ngi dang bishar bniah ruh ïa ka jingdawa kaba wan na ki paidbah,” u la ong.
U la ong ruh ba ki paidbah mynta ki la mad buh ki jingshah tynjuh na ka daw ba ki Nongmihkhmat kiba la bam smai ban shakri hok ïa u paidbah kim shym la leh eiei na ka bynta ka ïoh ka kot bad ka roi ka par, ka koit ka khiah, ka pule ka puthi, ka umbam umdih, ka ïohkam ïohjam jong ki paidbah.
