Shillong, Risaw 25: U Symbud Myntri Rangbah ka jylla u Bah Prestone Tynsong u la kyrpad ïa ka NEEPCO ba kan ym kynriah noh ïa ka ophis treikam ba ha khlieh duh jong ka ne ka Headquater na ka jylla namar ki paidbah ki don ka jingieid bad ka jingsnoh mynsiem kyrpang bad ka.
Ha ka jingkren ha ka jingsoi MoA hapdeng ka sorkar jylla bad ka NEEPCO u la ong ba ki paidbah ka jylla hi ki don ka jingsyrdoh mynsiem kyrpang ïa ka jylla bad namarkata ka NEEPCO kam dei ban kynriah noh na ka nongbah Shillong.
“Wat ha ka ïingdorbar ka mih ka jingkylli la ka NEEPCO ka mut kynriah shisha na Shillong bad nga la ai jubab ba ka NEEPCO kam don kum kata ka jingmut,” ong u Bah Prestone.
“Ngi la sngew ïa phi(NEEPCO) kum ki bynta ka sorkar jyllabad katba phi donkam ngi la theh lut, namarkata, wat kynriah noh nangne” u la buh jingkyrpad ïa ka NEEPCO.
Kumjuh na ka liang u Commissioner& Secretary jong ka tnat Bording jong ka sorkar jylla u Parvin Bakshi u la ong ba kam ju kham jia koit ba ki paidbah bad u luk u lak un don ka jingieid kyrpang ïa ki kompeni ka sorkar pdeng kumba long ïa ka NEEPCO.
“Nga ju ïoh sngew ïa ka jingpyrshah na ki paidbah bad ki sengbhalang ban pynkynriah noh ïa ka ophis ba heh duh ka NEEPCO na Meghalaya bad mynta nga ïai ban bad ngan ong ba ka NEEPCO kam don jingthmu ban mih noh na Shillong” la ong u Parvin.
U Parvin u la ong ba ka jingdon ka NEEPCO ha Meghalaya ka wanrah bad ka ai shibun ki jingmyntoi ïa ka jylla bad ki paidbah nongshong shnong bad dei namar kane ka sorkar jylla ruh ka ïaleh katba lah ban ïatreilang bad ka NEEPCO ban pyntrei shibun ki projek haba ïadei bad ka tnat bording.
Kumban shu pynkynmaw ha ki khyndiat bnai kiba la dep ka KSU ka la phah ruh da ka dorkhas sha u Amit Shah bad ka sorkar pdeng ba kim dei ban pynkynriah noh ïa ka ophis ba ha khliehduh na Shillong namar ka don ka jingkynnoh ba ka NEEPCO ka kynriah khyndiat khyndiat ka jingtreikam jong ka na Shillong sha Guwahati.bad ka don ruh ka jingthmu ban rah noh ïa ka Headquater na Shillong.
