Shillong, Risaw, 25: Ka tnat Forest ka Sorkar Jylla ka la ïoh lum pisa T.1.5 klur na ka jingpynkhyllem ïa ki dieng ha kaba ïadei bad ka jingshna ïa ka surok Four Lane kaba pynïasoh naduh Umshyrpi shaduh 7mer, Upper Shillong.
Ïa kane la pyntip da u nongwad RTI u Bah Disparsing Rani ha ka jingïakren bad ki lad pathai khubor ha ka sngi Baar.
U Bah Rani u la ïathuh ba katkum ka jubab RTI ba la ïoh pdiang na ka tnat Forest jong ka Sorkar Jylla ka pynsngewlyngngoh haduh katta katta ba ki dieng saw kiba la pynkhyllem ha shilynter ka surok 7mer shaduh Umshyrpi ki dei ki dieng kiba rem dor bha ha kaba ki nongwai khlaw ki tip bha ba kine ki dieng ki shongdor ym duna ïa ka T.2000 hajar shi Cubit.
“Hynrei ka long kaba sngew sammut ba ka jubab RTI ba la ïoh na ka tnat Forest ka pynpaw ba ka jingïoh lum pisa na kaba die ïa kine ki dieng ka long tang T.1.5 klur,” u la ong.
Halor ka jingujor jong ki paidbah ba ka jingot ïa ki dieng kiba khyllem ha surok ka slem bha ha surok Upper Shillong, u Bah Rani la ïathuh ba ka jubab RTI na ka tnat Forest ka pynpaw ba ka don tang kawei ka Power Chain, kawei ka wailyngkut, kawei ka wait bnoh, uwei u sdieh, ki wait prat ki don khatwei tylli, ka Handsaw ka don tang kawei.
Ha kaba ïadei bad ka jaka ha Upper Shillong ba la kam da ka Kur Kurkalang, ka jubab RTI na ka tnat Forest ka pynpaw ba kane ka khlaw ka dei jong ka tnat Forest and Environment bad kam dei ka Revenue Land.
