Yn ïaknieh nam lahduh ka Syndai Pyllun SC bad Amlarem SC ha ka 1st War Jaiñtia Invitation FT 2025
Jowai, Jymmang 11: Ka lympung ïalehkai phutbol bala pynïaid daka Football Committee jong ka Sports and Youth Sub Committee ka WJSU, ïa kaba la tip kum ka ‘First War Jaiñtia Invitation Football Tournament 2025’, kaba la long ha ka sngi Saitjaiñ (10 tarik Jymmang, 2025) haka jingïakhun ïa ka Semi Final kaba ar hapdeng ka Padu United Sports Club pyrshah ïa ka Syndai Pyllun Sports Club ha madan phutbol ka Amsohkrut Amshipai, Amlarem Civil Sub-Division.
Haba phai sha kane ka jingïakhun lah ban kdew ba ka jingïalehkai kala long kaba itynnad bad kaba ïakhaid bha haduh katta katta ha kaba ka Syndai Pyllun Sports Club kala khur ïa ka jingjop da ka said lyngba ka 1-0 kol. ïa kane ka kol la ïoh ban pynkhih haka minit kaba 10 da u Refill Syndai jersey No. 16.
Katba na ka liang ka Padu United Sports Club ka la ïaksaid tyngeh hynrei kam lah satia ban pynphai ïa katei ka kol.
Lyngba kane ka shi kol ka Syndai Pyllun Sports Club kala jam shakhmat sha ka Final jong ka First War Jaiñtia Invitation Football Tournament 2025 bad kan pynkhreh ban ïaknieh ïa ka nam lahduh pyrshah ïaka Amlarem Social Club ha ka 17 tarik mynta u Jymmang, 2025 ha ka jingïakhun kaba la buh ha ka por 2 baje nohphai sngi ha katei kajuh hi ka madan.
Ha kane ka sngi pynhap pyrda (Closing Ceremony) u MLA ka thaiñ ma Lahkmen Rymbui uba long ruh u nongaibuit (Advisor) jong ka sorkar jylla un long kum u Kongsan, haka jingdonlang u Aibor Khongjee, uba long u rangïalehkai phutbol bna nam ka Jylla Meghalya uba la don bynta ha ka kynhun phutbol jong ka ri India ha ki lympung ïalehkai bar ri (International Tournament), nalor u BS Hayong, prominent retired Geologist ka ONGC bad ki riew rangbah ka thaiñ.
La pyntip ruh ba ka Sports and Youth Sub Committee ka seng kan pynlong ruh ïa ki program pynbyrngia ïa ki paidbah naduh ka por 6 baje haduh 10 baje mynmiet da ka Singing Competition bad Dancing Competition khnang ba ki nongïashim bynta kin ïoh lad ban pyni pyrthei ïala ka sap ka phong kino kino kiba kwah ban ïashim bynta ki lah ban phone ha u ne number 8787374071/6909819312
Khatduh ka seng ka khot bad ka wer ïa ki riewieit phutbol hapoh War Jaiñtia bad na kylleng ka Rilum Khasi Jaiñtia ban ïa wan sakhi lang ha kane ka phainal jong ka First War Jaiñtia Invitation Football Tournament 2025.