Jowai, Jymmang 11: Ka Phramer CC kala khur ïa ka jingjop da kaba pynliem haduh 79 ron ïa ka Khliehtyrshi SC, ha kawei naki jingïalehkai jong ka lympung District Cricket League 2025 bala pynïaid daka West Jaiñtia Hills District Cricket Association (WJHDCA) kaba la long ha ka sngi Saitjaiñ (10 tarik u Jymmang, 2025) ha Mini Stadium, Khliehtyrshi.
Haba phai sha kane ka jingïalehkai, ïa ka jingkynting pisa (toss) la jop da ka Phramer CC kaba la kam trai ban tied nyngkong. Ka Phramer CC ka la lah ba kan kamai 169 ron na ki 20 ober shuwa ban khyllem baroh 10 wiket.
U James Nongrum ula long uba kongsan tam napdeng ki nongtied jong ka Phramer CC da kaba kamai marwei 38 ron na ki 29 bol kiba u la bynrap naki ar tylli ki Six (6s) bad 4 tylli ki Fours (4s). Na ka liang jong u Melan Suchiang ula noh synñiang 25 ron na ki 11 bol kiba kynthup ïa ar tylli ki Six (6s) bad kawei ka Four (4), nangta u Pyrkhat Sari ula kamai 25 ron na ki 18 bol ryngkat bad lai tylli ki Fours (4). U Arman Dkhar, nongkawang ball jong ka Khliehtyrshi SC u la ïoh ban khur 3 wiket na ki 4 ober.
Haba wanphai ban beh ïa ka thong ki nongtied jong ka Khliehtyrshi SC kim shym la lah satia ban pynpoi ïa ka kynhun sha ka thong ha kaba ka kynhun ka la lah ban kamai tang 90 ron haduh kaba kut jong ki 20 ober bad hap 8 wiket.
Napdeng ki nongtied jong ka dei tang u Hoppermoon Rymbai uba la kamai 17 ron na ki 32 bol (khlem out) bad u Lakhon Dkhar 11 ron na ki 16 bol (khlem out) kiba lah ban kynjoh sha ka phew ron. U Hamm Lyngdoh, nongkawang ball jong ka Phramer CC u la khur 3 wiket na ki 4 ober kaba la pynlong ïa u ban khur ïa ka Nam Man of the Match.
Ka jingïalehkai ha kane ka sngi Nyngkong (12/05/2025) kan long hapdeng ka Mowkaiaw CYC pyrshah ïaka Moodymmai SC naduh ka por 8 shiteng mynstep.
