Yn dang bun ki ban shah kem ha ka jinghiar thma ïa ka CMO, Tura, ong u Bah Prestone

Shillong, Naitung, 27: U Symbud Myntri Rangbah ka Jylla uba peit ïa ka tnat Kam Pohing u Bah Prestone Tynsong ha ka sngi Palei u la ong ba kin dang don shuh shuh ki briew ki ban shahkem halor ka jingdonkti ban hiar thma ïa ka Chief Minister’s Office, Tura ha ka 24 tarik mynta u bnai.
“Bun ki ban dang shah kem. Baroh kiba donkti kin ngat ha ki kti jong ka aiñ. Ka aiñ kan sa leh la ka jong ka kamram,” la ong u Bah Tynsong ha ka jingïakren bad ki lad pathai khubor.
Katkum ka jingïathuh jong, u, palat 35 ngut ki briew ki la shah kem haduh mynta halor ka jingdonkti. “Ai ba ngin pyndep shwa ïa baroh ki jingdonkam. Ynda ngi la kem bad ngi la pyndep lut nadong shadong, ka jingtohkit kan sa ïathuh ïa ngi, kaei kaba ngin leh hadien kata,” u la bynrap.
Haba kam ba kane ka jingjia, ka dei ka jingïasylla saiñpyrthei, u Bah Tynsong, ula ong, “katkum ka jingkheiñ jingdiah jong nga, ka paw shai ba bun na kiba la shah kem, ki dei ki dkhot jong ki seng saiñpyrthei. Ka paw (ba kane ka jingjia) ka dei kaba la kynshoit da ki seng saiñpyrthei. Ka dei ka ‘political agenda”. Kam dei satia ka jingïashrut Khasi-Jaiñtia lane Garo, ka dei beit ka kam jong ki katto katne ki seng saiñpyrthei. Watla ngam pat lah ban shu pynkut noh kumto, hynrei ai ba ka jingtohkit kan ïaid shakhmat bad ngin sa tip ïa ki jingshisha.”
U Director General of Police (DGP) ka Jylla, u Dr LR Bishnoi dang shen u la ïathuh ba ki tnat syntiat jong ki Pulit ki la lai ksai ba ki paidbhur ki la thmu ruh wat ban shim ïa ka jingim jong u Myntri Rangbah ban shu shoh pynmynsaw ïa u na khlieh da u maw lane da u bilor.
Ha kaba ïadei bad ka jingdawa jong ka TMC ban sospon mardor ïa u DGP bad ïa u Superintendent of Police jong kaWest Garo Hills halor ka jingphiel kaba buh jingma ïa ka jingim jong u Myntri Rangbah bad kiwei kiwei, u Symbud Myntri Rangbah ula ong, “phi lah ban dawa katba phi kwah hynrei ngin ïakren ïa ka jingshisha. Ka jingshisha ka long, ngi la kem ïa kiba donkti naduh kato ka miet bad ngi lap ba bun na kiba la shah kem ki dei ki dkhot jong ki seng saiñpyrthei, kaba ngan hap ban pynkut da kaba ong, kine ki dei ki ishu saiñpyrthei. Kine ki dei ki buit saiñpyrthei ba la thmu da ki katto katne ki seng saiñpyrthei. Hynrei, ngam kwah ban kren palat ïa kata hynrei ai ba ka aiñ kan leh la ka jong ka kamram.
Da kaba pynpaw ba ka jingtohkit kaba bniah kan sa ïaid, u Bah Tynsong, u la ong, “ngin ïai bteng ban leh ïa kata bad nga kmen ruh ba ka tnat Pulit ki la leh la ka jong kamram ban pynneh ïa ka shongsuk shongsaiñ bad nga ai khublei ruh ïa ki.” U la kyrpad ïa ka tnat Pulit ba kan kham peitngor ïa kum kine ki jingjia bad ban ym ailad shuh ban dang jia nangne shakhmat.
U Symbud Myntri Rangbah u la takraiñ tyngeh ïa u nongïalam jong ka TMC uba long ruh u Myntri Rangbah barim u Mukul Sangma halor ka jingkynnoh ba ki Pulit ka West Garo Hills District ki la pynhiar kyrdan ïalade kum ki atiar jong ki Nongïalam seng saiñpyrthei kiba bat ïa u lakam synshar jong ka Sorkar.
“U Dr Mukul Sangma ruh u la long Myntri Rangbah la jan palat 7-8 snem, nga ngeit haba u kren kumta, hato u pyrshang ban ong ha ka por ba u dang long Myntri Rangbah, hato u ju pyndonkam ïa ka tnat Pulit na ka bynta ka jingmyntoi jong u shimet? Lada ka long kumta, ka long kaba sngewsih. Nga kren da kaba shai ba kum ka Sorkar ngi don hangne, la ka dei ïa u Myntri Rangbah, u Symbud Myntri Rangbah lane mano mano, ngi don hangne ym ban ïada ïalade hynrei ngin ïada ïa ki paidbah nongshong shnong jong ka Jylla Meghalaya,” u la ong.
U la kyntait ruh ba kan don ka jingduna na ka liang jong ka tnat syntiat jong ki Pulit bad ong, “lada phi ïakren ïa ki jingduna kam don satia hynrei ngan ïathuh ïa phi ba ngi donkam ban nang pynjanai shuh shuh. Ngin nang pynjanai khnang ba kum kito ki jingjia yn dup lah ban tehlakam,” u la ong.