Ai ka Home Ministry sha ka CBI ban tohkit, yn shim bishar shabar ka jylla Manipur
Ba shah pynïaid lyngkhuid ki 2 ngut ki Kynthei
New Delhi, Naitung 27: Ka tnad Korbar ri jong ka sorkar pdeng ka la rai ban aiti sha ka CBI halor ka jingshah pynîaid lyngkhuid jong ki arngut ki Kynthei ha Manipur.
Ki lad pathai khubor na nongbah Delhi ki ïathuh ba ïa kane ka rai la shim mynta ka sngi da ka tnad Korbar ri jong ka sorkar pdeng.
Lah ban kdew hangne ba kane ka jingshah pynïaid lyngkhuid jong ki arngut ki kynthei ka la jia ha ka 4 tarik u Jymmang mynta ka snem, kata shi sngi hadien ba la mih ka jingïakulmar ha Manipur, hynrei ka Video pat ka dang paw pyrthei dang ha kane ka taiew baladep.
Mat synmih pyrthei kane ka Video, ka ri India ka la khih puk ha kylleng kylleng ha kaba ka la don ka jingbitar, ka jingpynrem bad ka Parliament jong ka ri India ka la thnam puk. Ki Liang Pyrshah naduh ka sngi ba sdang ka Dorbar Lyuir ki la pynkhih ha baroh artylli ki ïing dorbar, kata ka Lok Sabha bad ka Rajya Sabha ban dawa ban pynlong ka jingïatai halor kane ka jingjia ha Manipur, kaba la pynlehraiñ ïa ka ri India hakhmat ka pyrthei.
Ym tip la kane ka jingaiti sha ka CBI ban tohkit ïa kane ka jingjia kan pynthanda ne em ïa ki Liang Pyrshah. Hynrei ki khubor ba la ïoh ki ïathuh ba ki Liang Pyrshah ki lah ban ther jem ïa ka sorkar u Modi ha ka No Confidence Motion, namar ba u Lamphang ka Lok Sabha, u la pdiang ïa ka jingtyrwa bym shaniah ki Liang Pyrshah ïa ka sorkar National Democratic Alliance ba la ïalam da ka BJP.