Yn bud pyrkhing ka sorkar ïa jingbthah ka ïingbishar, ong u Home Minister

Shillong, Risaw 20 : U Myntri Kampohing ka jylla, Bah Lahkmen Rymbui ha ka sngi Palei u la ong ba ka sorkar jylla kan bud pyrkhing ïa ki jingbthah jong ka Iing Bishar ban kem lut ïa baroh ki kam tih dewïong beain ha ka jylla.
Haba kren bad ki lad pathai khubor, u Myntri u la ong, “Kaei kaba ka Iing Bishar ka bthah, ka sorkar kan sa pyntreikam pura.”
Ka dei ha ka sngi Ba-ar, ba ka Meghalaya High Court ka la bthah ïa u Chief Secretary ka Jylla bad ruh ïa u Director General of Police ba kim dei satia ban sngap ïa ka jingphah kaba wan na ki bor sorkar ha ka jingpyntreikam ïa ka hukum ban kem naphang ïa ki kam dewïong beain ha ka jylla.
“U Chief Secretary bad u Director General of Police bad kiwei ki heh pulit kin pyntikna ba kan don ka jingtreikam kaba pyrkhing bha halor kane bad kin ym pyndem ha kano kano ka jingtuklar na ki bor sorkar haba ïadei bad kane,” ong ka full bench ha ka hukum hadien ba la dep ban bishar ïa ka PIL halor katei ka mat.
Nalorkata, ka Iing Bishar ka la maham lypa ruh ba u Chief Secretary ka jylla bad ruh u DGP ba kin hap ban shim ka jingkitkhlieh lada lap ba ka don ka jingleh beaiñ haba ïadei bad u dewïong ryngkat ka jingbthah ïa u DGP ban bthah ïa ki SP ha ki distrik ba kin pyntikna ba kan ym don satia ka jingïaid lait u dewïong beain la ka long lyngba ki trok lane da kino kino ki kali.