Yn bud dien u Myntri na u Symbud Myntri Rangbah halor ka jingsniew ki surok ha ri lum Garo

Shillong, Risaw 09 : U Myntri sorkar u Rakkam A Sangma uba dei ruh u MLA ka Rongara Siju constituency mynta ka sngi ula pyntip ba shen un sa shong jingïalang bad u Symbud Myntri Rangbah ba khmih ïa ka tnad PWD (Roads) lem bad ki Deputy Commissioner (DC) ka thaiñ Garo Hills ban ïakren halor ki sienjam ban pynbha ïa ki surok hapoh ka thaiñ.
Haba kren sha ki lad pathai khubor u Rakkam ula ong ba ki surok hapoh ka Ri-lum Garo naduh Baghmara, Nogaon shaduh Dalu khamtam ki surok bah National Highway ki la sdang jot, kaba la wanrah ka jingeh ïa ki paidbah ka thaiñ.
U Rakkam ula ïathuh ba naka liang ka tnat Ministry of Road Transport and Highways ka sorkar pdeng kala myjur ïa ka jingtyrwa ka sorkar Meghalaya ban kyntiew kyrdan ïa kine ki surok sha ki National Highway namar ki dei ruh ki surok kiba pyndonkam da kiwei pat ki nongshong shnong ki jylla ka thaiñ shathei lam mihngi (North East).
“Ka jingeh ban kyntiew ïa ki surok sha ki National Highway ka dei hi namar ka jingeh ban ïoh jaka hynrei na ka liang ka sorkar ka la shim khia bad dang shen nga la lum ïa ka jingïalang ha Baghmara bad nga la ïoh jingtip ba shen yn sa ïoh noh ïa ki jaka ban pynheh ïa ki surok hapoh ka Ri-lum Garo” la ong u Rakkam.
Ha kaba ïadei bad ka jingpynbha ïa ki surok ba la jot, u Rakkam ula ong “Na ka liang ka tnat Ministry of Road Transport and Highways ka sorkar pdeng ka la mynjur ban ïarap T.6 klur ban pynbha ïa ki surok ha Ri-lum Garo hynrei nga sngew ba kane ka mang tyngka ka dang rit palat ban pynbha lut ïa ki surok hapoh ka thaiñ”.
Halor kane u Rakkam ula ong ba shen un sa kynduh ïa u Symbud Myntri Rangbah ban ïakren ha ka ban pyrshang pynïoh kham bun ka jingïarap ha ka liang ka pisa ban lah pynbha noh ïa ki surok ba la jot.