Shillong Risaw 09 : Ka Fashion Society Shillong, kan pynlong ïa ka Miss Shillong 2023 bad Ms Supermon Beauty Pageant ha ka 14 tarik u Risaw ha Soso Tham Auditorium, Shillong kum shibynta na ka jingrakhe dap 40 snem ka seng.
Kane ka jingïakob thei bhabriew kan sdang ha ka por 4 baje janmiet, pynbna u Secretary, Public Realtion ka FSS R.L Sohlya ha ka kyrwoh ba la phah hynne ka sngi Nyngkong.
La pnyntip ba ka FSS ka la pynlong ïa ka audition mynta la 2 bnai tam bad ka la jied ïa ki thei bhabriew kiba don sap, kiba la pyndep ïa ka jingïoh jinghikai ha kaba ïadei bad ka rukom kren, rukom ïaid ‘Catwalk’ bad ban tei ïa la ka long rynnieng.
La ïathuh ba katei ka jingïakob kan sdang da ka jingpyni ïa ka riam tynrai ban sa pynbud da ka jingshad kaba la pynwandur da ka Ribha War Lyngkhoi bad ïa ka Grand Finale la pynwandur da u Chris Kurbah bad ka Naphisa Pala.
Ka Fashion Society Shillong kan pynlong ruh ïa ka Ms Supermom Beauty Pageant, ka jingïakob na ka bynta ki ‘Single Mother’ ne ki Longkmie kiba kyrshan marwei ïa ka ïing bad kane ka rynsan kan pynkup burom ïa ki ba kin lah ban pynurlong ïa ka jingphohsniew bad ka jingangnud ka jong ki bad ban sdang biang ïa ka jingim kaba thymmai.
Ki nongjop ïa ka Miss Shillong, kin ïoh ïa ka Pansngiat, ka pisa T. 1 Lak, T.75,000 bad T.50,000, katba ki nongjop ha ka Ms. Supermom kin ïoh ïa ka Pansngiat ka pisa T.50,000, T. 30,000 bad T. 20,000.
Kiba ïoh ïa kiwei pat ki khusnam kum ka Miss Beautiful Eyes, Miss Beautiful Skin, Miss Beautiful Hair, Miss Beautiful Smile bad Miss Catwalk kin ïoh mar T.5000.
Ha katei ka sngi, ka FSS kan pyni ruh ïa ka sap jongka Liza Lyngdoh, kaba tbit ban tem ïa ka Guitar, kaba dei na ka shnong Mawkyrwat bad mynta ka Liza ka ai jinghikai tem ha Bangalore.
