Yn ap ktem ki Khasi Tourist ïoh don ba wan kamai ki kali Private na Assam

Shillong, K’lyngkot 04: Ka All Khasi Meghalaya Tourist Taxi Association, ka la rai ban nym leit kamai sha Assam ha ka 5 bad 6 tarik mynta u bnai namar ba ka don ka jingïakhih ki kali kamai ha Assam ban pyrshah ïa ka aiñ Bharatiya Nyay Sanhita, ka aiñ kaba ïadei ba ki draibar kiba phet hadien ba ki la tynrah briew.Kane ka aiñ thymmai ong ba kiba leh kumne kin shah set phatok shiphew snem bad kin shah daiñ kuna 7 lak tyngka.
Kane kadei ka aiñ ba thymmai ba la pynkylla da ka sorkar pdeng dang shen.
U President jong ka All Khasi Meghalaya Tourist Taxi Association, u Bah Recaldinus Dohling, u la ong ki dkhot jong ka Seng, kin nym leit ban kamai na Guwahati kumba ju leit kamai man ka por. Hynrei ha kine ki sngi, ki dkhot jong ka Seng kin ap ktem ha Byrnihat bad kiwei de ki jaka jong ka Ribhoi District ïoh don ki kali Private na Assam kiba wan kamai shane. U Bah Recaldinus u la ïathuh ba ka Seng ka la ju lap ba ha haba don ki strike ha Assam, ki don ki driver kiba leh buit tuh kiba wan da ki kali Private ban kamai shane ban kit ïa ki nongshang pyrthei sha Sohra bad sha kiwei kiwei de ki jaka.
Ym tang ïa ki kali Assam, na ka liang ka Seng kan peit ruh ïoh don ki driver ba ju ñiah kali tourist kiab pyndonkam pat da ki kali private nangne na Shillong ban leit kit passenger ban leit shang pyrthei.