Shillong, K’lyngkot, 04: Mar ïa sdang une u snem thymmai 2024, ka seng kieng atiar Hynñiewtrep National Liberation Council (HNLC) ba la shah kheiñ be-aiñ ka la rai ban ym bteng shuh ïa ka jingïakren ïasuk bad ka Sorkar.
Ha ka shithi ba ka seng ka la phah ha ka sngi Palei sha ka Ministry of Home Affairs ka Sorkar India lyngba u Advisor (MHA North East) u AK Mishra ïa kaba la soi da u Chairman Cum C-in-C Bah Bobby Marweiñ bad u General Secretary-cum-Publicity Secretary Bah Saiñkupar Nongtraw, ka seng ka la pynshai ka la lah shim ïa kane ka rai namar ka jingbym long kloi jong ka Sorkar Jylla lem bad ka Sorkar Pdeng ban mynjur ïa ki katto katne ki jingdawa jong ka seng hadien ba la sdang ka jingïakren ïasuk.
Ka HNLC ka la dawa ïa ka Sorkar ban weng noh ïa ka HNLC na ka thup ki seng beaiñ ha ka ri India, ka jingpyndam noh ïa baroh ki mukotduma ba dang sah jong ki dkhot ka seng bad ka jingpyllait phatok ïa baroh ki dkhot ka HNLC bad kumjuh ïa kiba donkti ban ïarap ïa ka seng. Kumta u ksai ka jingïakren bad kane ka Seng kieng atiar barim ka jylla ula dkut noh ïa kaba mynta.
Ngi lah ban kynmaw ruh ba hashwa kane, ka HNLC ka la pynmih ruh ïa ka ka jingbyrngem ïa u MLA ka NPP na Sohra Constituency u Bah Gavin Mylliem da kaba kynnoh ba dei na ka daw bad ka jingbahkhlieh jong u ba ka Sorkar Jylla ka la ïaid shakhmat ban khang khyrdep syndon ïa ka karkhana Mawmluh Cherra Cement Limited (MCCL). Hato ki nongïalam jong ka HNLC ki ïohi neem ba ka thaiñ Sohra ka kiew bha ha kawei pat ka liang da ka jingdon ki jaka jngohkai pyrthei kiba pawnam ha ka pyrthei?
Ka seng ka la wer ruh ïa ki nongtrei ka MCCL ban pynïasoh kum ki dkhot da kaba kular bad ka jingsiew tulop kaba T. 25,000 hajar shi bnai. Kane ka jingbyrngem jong ka HNLC ka wan hadien ba ka Sorkar ka la thmu ban ïaid shakhmat ban pynduh noh ïa ka MCCL da kaba pynkynriah kam noh ïa baroh ki nongtrei sha kiwei ki shnat jong ka Sorkar bad ban ai kata ka “Golden Handshake” ïa kito kiba lah jan dei ka por shongthait jong ki.
Ngi sngewthuh balei ka HNLC ka pyrshah ïa ka jingpynduh noh ïa ka MCCL namarba dalade hi ka kam ba ka dei ka lad kamai jakpoh jong ki nong Sohra. Hynrei ka jingkylli ka mih ba balei ka HNLC, lyngba Bah Saiñkupar Nongtraw ka pynmih ka ïa jingbyrngem thik tang ïa u MLA jong ka Sohra Constituency. Ha u snem 2021, hadien ka jingshah pynïap jong u Chairman barim ka HNLC, u Bah Cheristerfield Thangkhiew, ka HNLC ka la byrngem ban pynhiar kput ïa u Myntri ka tnat Kam Pohiing Bah Lahkmen Rymbui ryngkat ki arngut ki dkhot ka HNLC ba l pyndemwait, kata u Bah Herman Pakynteiñ bad ïa u Treng Saw. Ka HNLC ka la byrngem kumne da kaba kynnoh ba khlem ka muhor u Myntri ka Tnat Kam Pohing, ki Pulit kin ym jin da la ïaid shakhmat ïa ka kam jong ki.
Ka jingkylli kaba mih mynta ka long, hato kum kine ki jingbyrngem shimet ïa ki nongmihkhmat ba la jied da ki paidbah ki long kiba lah ban pdiang ha ka imlang sahlang ba shongsuk jong ngi mynta? Hato da ka jingkynrandien noh na ka miej jingïakren ïasuk, ka HNLC ka thmu ban bteng biang ïa ka jingïaleh jong ka na Bangladesh ? Hato ka HNLC ka thmu ban bteng biang ïa ki kam pyntriem jong ka kumba ka lah leh ha u 2021 ha kaba ki riew madan ba lui lui ki kylla langknia? Hato ka HNLC ka lah ban pynbiang ïa kata ka tulop ba T. 25,000 ïa ki dkhot ban rung thymmai bad naei kan pynmih ïa kata ka pisa?
Ki jingkylli kiba bun ki mih ha kaba ïadei bad kane ka mat jong kane ka seng kieng atiar ka jylla. Bun kiba la mad ïa ka jingsyier mynsiem bad ïa ka jingbymshong suk ha kito ki snem ba la leit noh.
Ki jingshah pynïap, ki jingshah dawa pisa, ki jingshah rahbor kiba bun kiba la jia ha kito ki por. Hato ngi kum ka imlang sahlang ba shongsuk mynta ngin hap mad biang kito ki por ba shyrkhei khamtam mynta lei lei ba ka jylla jong ngi ka long kaba la bna nam ha ka jingkiew shaphrang ha ki kam jngohkai pyrthei kaba lah wanrah ruh ïa ka lad kamai jakpoh ïa kiba bun ki samla.
