Shillong, Jymmang 23: Ka High Power Committee (HPC) kaba la long mynta ka sngi, ka la rai ban nym shah shuh ïano ïano sha ka jingtei ba thymmai jong ka Assembly ha Mawdiangdiang khlem da ïoh jingbit.
ïa kane la ïathuh da u Speaker bad Chairman ka HPC hadien ba la wai ka jingïalang da kaba ong ruh ba kane ka jingpyrkhing ban rung sha kane ka jaka, ka long na ka bynta ban lait na kino ki jingmynsaw lada rung kulmar hangtei.
Ha kajuh ka por u Bah Metbah, u la ïathuh ba yn aiti ha kawei na ki IIT ban tohkit lut ïa baroh ki daw kiba la pynlong ïa kane ka jingtei ban twa. Ka Committee ka la jied ïa ki lai tylli ki IIT, kata ka IIT Guwahati, IIT Kolkata bad IIT Delhi bad kano kano kaba kloi ban shimti ïa kane ka jingtohkit yn sa aiti ha kata.
“Ka IIT kan tohkit bad peit sani bha ym tang ïa ka bynta kaba twa, hynrei kan peit ruh ïa kiwei ki jingtei jong ka ïingdorbar, naduh ka mala ba sha trai duh, ki kamra jong u Speaker, u Myntri Rangbah, ki Hall bad kiwei kiwei de”, u la ong, da kaba bynrap ba ym shym la buh por katno por kat pyndep, hynrei kloi katba lah tangba yn ailad ïa ki ba kin pyndep ïa ka jingrohkit kaba bniah bha.
Halor ka jingpynkitkhlieh mano ba bakla, u Bah Metbah, u la ong ba kan shong hadien ba ladep kane ka jingtohkit.
U la ïathuh ruh ba katba ym pat dep ka jingtohkit baroh ki jingtrei ha kane ka ïingdorbar Thawaiñ kin sangeh noh shuwa.
Shuh shuh u Chairman ka HPC, u la ïathuh ba khnang ban khanglad ïa ka jingrung jong ka um sha ka bynta kaba la pra, yn tap noh ha baroh kawei ka bynta kaba la pra. Nalorkata ruh la rai ba ïa ki lyngkhot lyngkhai kiba la twa na ka dome yn nym pynkhih satia tad haduh ban da dep ka jingtohkit.
Ha kane ka jingïalang la don lang ruh u Myntri Rangbah, u Conrad Sangma, u Nongïalam ka Liang Pyrshahm, u Dr. Mukul Sangma, kiwei pat ki dkhot ka HPC kiba kynthup ïa u Dy. Speaker, u Timothy D. Shira, u Myntri ka tnad Transport, u Bah Sniawbhalang Dhar, u Myntri ka tnad PWD (Building) u Bah Dasakhiat Lamare, ka Kong Ampareen Lyngdoh, MLA East Shillong, u Bah Renikton Lyngdoh Tongkhar, MLA bad Myntri ka tnad PHE, Kong Rebecca Suchiang, Chief Secretary bad kiwei kiwei de ki ophisar.
Halor ka jingaiti ïa ki bynta na ka jingtei ïa katei ka jingshna ïa ka ïingdorbar, u Myntri ka tnad PWD(Building) u Bah Dasakhiat Lamare, u la ong ba ka Rajkiya Nirman Nigam Ltd na Uttar Pradesh, ka la aiti kumba 40% ka jingtrei sha ka Badri Rai & Company kaba na Assam bad kane ka la don lypa ha ka kyndon ha ka por ba khot tender.
Ha shuwa jong kane ka jingïalang, u Speaker bad u Myntri Rangbah bad kiwei de ki Myntri ki la leit jngoh ïa ka jingphyllem ka ïingdorbar bad kiwei ki bynta jong ka jingtrei.
