Ym shah ban rah pisa palat 50 hajar tyngka, hapoh 10 sngi ki suloi kin poi ha ki thanad katkum ka 163 BNSS

0

Mawkyrwat, K’Lyngkot 29 : U bah B. Mawlong, IAS, District Magistrate, South West Khasi Hills District u la pynbna ba da ka ka bor ba la ai hapoh jong ka kyndon 163 BNSS ba ka la don ka jingmana ïa kino kino ki briew ne ki kynhun ban nym rah pisa palat ïa ka 50 hajar tyngka bad ïa ki suloi ne ki tiar siat hapoh 10 sngi dei ban leit buh ha ki thanad ba jan jong ki bad kane ka long khnang ban wanrah ïa ka elekshon kaba khuid ba suba ha ka por thep vote.
Kane ka hukum ka mih hadien ba u Governor jong ka Jylla Meghalaya u la pynbna ïa ka General Election sha ka Khasi Hills Autonomous District Council 2025 bad lyngba ka District Council Affairs Department ka la pyntreikam ïa ka Model Code of Conduct (MCC) bad kiwei pat ki jingbthah hapoh ka Khasi Hills Autonomous District Council bad ka Jaiñtia Hills Autonomous District Council.
Ym tang kata, u District Magistrate ula buh ruh ïa katto katne ki jingmana na ka bynta ki kyrtong ki ban ïa aireng lane ki agent lane ki political party: kata ban ym shah ban thoh ha ki kynroh, ban tah ïa ki poster lane ki paper lane ka jingpynjot ha kano kano ka bynta, lane ka jingpynïeng ïa ki cutouts, hording, banner bad kiwei kiwei ha ki jaka paidbah, yn ym shah ïa ki political party ne ki kyrtong ban buh ïa ki jingthoh ne ki banner harud surok lane ha ki jaka ba ïaid paidbah, yn ym shah ban thoh ha ki kynroh, ban tah ïa ki poster lane ki paper lane ka jingpynjot ha kano kano ka bynta, lane ka jingpynïeng ïa ki cutouts, hording, banner bad kiwei kiwei ha ki jaka paidbah khlem ka jingpan jingbit shuwa na ki trai jaka bad ka jingai jingbit na ka ophis jong u District Magistrate.
Nangta, yn ym shah ban pynlong ïa ki jingïalang paidbah khlem ka jingpan jingbit na ka ophis jong u District Magistrate bad na ki rangbah shnong ha kaba ïa dei bad ka jaka ban pynlong jingïalang, yn ym shah ban pyndonkam ïa ki tiar pynsawa hapdeng ka por 10 baje mynmiet bad 6 baje mynstep bad lada jia ba ki pyndonkam khlem ka jingïoh jingbit na ka ophis jong u District Magistrate ïa kitei ki tiar ynsa kurup noh da ki bor ba dei khmieh katba khaduh ka long ba yn ym shah ban pynlong ïa ki jingïaid paidbah khlem da ïoh jingbit na ka ophis jong u District Magistrate.
Shuh shuh u District Magistrate jong ka South West Khasi Hills District, Mawkyrwat katkum ba la pynkup bor hapoh ka kyndon 163 jong ka BNSS u la mana ïa baroh kito kiba don ki suloi ne tiar siat ba kin leit buh noh ïa ki ha ki Police Station kiba don hajan kum ka ha Mawkyrwat, Nonghyllam bad Ranikor Police Station hapoh 10 sngi naduh ba la pynmih ïa kane ka hukum na ka bynta ka shongsuk shongshngaiñ bad ka jingïaid beit ïaid ryntih jong ka elekshon jong mynta u snem.
Kine ki hukum kin treikam shi syndon ha baroh kawei ka South West Khasi Hills District tad haduh ban da kut ka MDC Election 2025.

Leave A Reply

Your email address will not be published.