Ym pat rai u Bah George ban ïakhun MP, kwah ban syllok shwa lada don ka jingtyrwa

Shillong, Risaw 25 : U Nongïalam ka All India Trinamool Congress, Bah George B Lyngdoh ha ka sngi Balang u la ong ba un ïa syllok shwa lada don shisha ka jingtyrwa ba un aireng ha kane ka elekshon MP kaban sa long shen ha u snem ban wan.
Katei ka jingkren jong u kadei hadien ba ka la mih ka jingkren na u nongïalam ka Congress ba dei ruh u MP ba mynta ka Shillong Bah Vincent H Pala ba ka NPP ka khroh kyrtong na kiwei pat ki party bad khot ruh ïa u MLA barim ka Umroi, Bah George Lyngdoh ban long u kyrtong jong ki ha kane ka elekshon ban wan.
“Lada kum kine ki jingtyrwa ki wan, nga hap ban ïa syllok shwa bad kiba bun balang la ka long naduh ki paralok ba ïajan, ha ïing ha sem, ki nongïalam bad ki nongkyrshan ba radbah. Ka shong eh ruh ha ka jingai jingmut jong ki bad hadien kata ngin sa shim lang ïa ka rai kumno ban ïaid shakhmat,” ong u Bah George.
Shuh shuh haba jubab pat halor ka jingkren jong u Bah Pala, utei u MLA barim ka Umroi u la ong, “Lada u Bah Pala u la tyrwa ïa kata, ngin sa peit namar lada jia ba u MP ba mynta u ïohi ba don u kyrtong ba kham biang kam don jingeh ei ei ruh em.”
Tangba, u la pynpaw pat ba haduh mynta ym pat don satia mano mano ruh na ka NPP kiba wan ban kynduh ïa u.
Da kaba pynpaw ba kiei kiei baroh kin shong ha ka jinglong jingman, utei u nongmihkhmat ba rim u la ong ba namar katei ka lympung kadei kaba kham ïar kumta donkam ruh ïa ka jingïasyllok kaba kham bniah.
Halor ka jingkylli la u kloi ban mih noh na ka TMC, u Bah George u la ong, “Ïa kine baroh phin sa tip ynda la dei ka pore namar ka elekshon MP kam don jingïadei bad nga kum u dkhot ka TMC. Ka kam MP ka la dei kawei pat ka bynta kaba pher namar ka long palat shabar jong ka party. Kumta, kano kano ka jingïasyllok kadei ban long shabar jong ka party kumjuh.
Haba ïadei pat bad ka TMC, u la ong ba kin sa ïa kren bad u President ïa kino kino ki kam kiba ïadei bad ka party bad shim lang ïa ka rai ba long salonsar.
Shuh shuh haba jubab halor ka jingtyrwa da u State President ka AITC ïa u kum u kyrtong MP na ka party, na ka liang u Bah George u la pynpaw ba haduh mynta kam don kano kano ka rai. “Ka dang dei tang ka jingpynpaw shimet jong u, ym ka rai jong ka party ban sei kyrtong hynrei ïa mynta hi ym pat don kano kano ka rai ne ka jingïalang halor kane.”