Ym pat rai ka Sorkar halor ka “Show Cause Notice” ïa ki 10 ngut ki SP bad 18 ngut ki Inspector

Shillong, Naiwieng 2 : Ka sorkar jylla kam pat shim rai halor ka “Show Cause Notice” ne ka jingpan jubab jingpynshai na ki 10 ngut ki Superintendent of Police (SP) bad 18 ngut ki Inspector of Police halor ka jingbym lah satia jongki ban khanglad ïa ka jingtih bad khaïi dewiong beaiñ hapoh ka jylla.
“ Ym pat don kano kano ruh ka rai halor katei ka show cause notice kaba la phah sha kitei ki pulit ophisar bad ym pat don kano kano ka jingpynsaja ïa ki ruh da ki bor ba dei peit” ïathuh u Justice (Rtd) u Brojendra Prasad Katakey ha ka kaiphod ba khathynniew kaba u la phah sha ka ïing bishar High Court jongka jylla ha ka 22 Nailur 2023.
Ka ïing Bishar High Court da kaba shim khia ïa ka kaiphod ba la wanrah hakhmat jongka, ka la pynmih ïa ka hukum ha ka 27 tarik Jylliew 2023 ban thung jingtohkit ban lap ïa ki briew kiba ïadon kti ha kine ki kam tih bad khaïi dewiong beaiñ bad kaei kaba ki bor ba dei peit ïa ka synshar khadar ki leh khamtam ki bor pulit.
Dei hadien kane ba u Director General of Police (DGP u la ai ïa kane ka show cause notice ne pan jubab jingpynshai na ki 10 ngut ki SP ba ki dei ban jubab hapoh ka 24 kynta balei ba kim lah ban teh lakam ïa ka jingtih bad khaïi dewiong beaiñ ha ka jylla.
Kine ki shiphew ngut ki SP ki kynthup ïa u bah Sylvester Nongtnger (East Khasi Hills), Siddhart Kumar Ambedkar (East Garo Hills), Jagpal Singh Dhanoa (East Jaintia Hills), Shailendra Bamaniya (North Garo Hills), Giri Prasad (Ri Bhoi), Maxwell B Syiem (Eastern West Khasi Hills), GD Kharwanlang (South West Khasi Hills), AT Sangma (South Garo Hills), C Syrti (West Jaintia Hills) bad BD Marak (West Khasi Hills).
Kat kum ka notice kaba la ai kata 16 tarik Jymmang da u Chief Secretary ka jyla la pynpaw ka jingsngew bitar halor ka jingbym lah ki SP jong ki district ba ki surok bah ki ïaid bad kito ki district kiba don ki par dewiong balei ba kim lah ban tehlakam ïa kane ka jingtih bad khaïi dewiong beaiñ kaba long ka jingpynkheiñ ïa ka hukum jongka ïing bishar Supreme Cort , ka NGT bad ka High Court jongka jylla. Kine ki ïing bishar ki la bthah ba dei ban peitngor bad kem ïa ki trok kiba kit dewiong beaiñ bad kumjuh ruh ban khang ïa ka jingtih dewiong beaiñ hynrei kane ka bteng beit kumba la kdew da ka kaiphod kaba khadlai jong u Justice Katakey ba la ai sha ka ïing bishar. Kat kum ka jingpan jubab jingpynshai ka long “Balei ym lah ban ai jingpynshitom ïaphi kat kum ki kyndon aiñ na ka bynta kane ka jingbym lah jong phi ban khanglad ïa kane ka jingtih bad khaïi dewiong beaiñ. Lada ym lah ban ai ka jubab halor kane ka notice yn sa pynshitom ïa phi pat kum ki kyndon aiñ jong ki tnad sorkar”.
UDGP u la pan ruh ïa ka jubab jingpynshai na ki 18 ngut ki Inspector kiba kynthup CD Shira (Resubelpara & Bajengdoba PS, NGH), S Wanshnong (Lumdiengjri PS, EKH), B Marbaniang (Diengpasoh PS, EKH), P Lamare (Mawlai PS, EKH), P Baida (Khanapara PS, Ri Bhoi), N Wahlang (Nongpoh PS, Ri Bhoi), MR Marak (Umiam PS, Ri Bhoi), DSR Lakiang (Nongpoh), S Baraily (Umiam), RM Sangma (Rongjeng, EGH), SA Sangma (Williamnagar, EGH), M Koch (Baghmara, SGH), S Kharjana (Mairang, EWKH), BR Marak (Amlarem, WJH), WP Nongtdu (Khliehriat PS, EJH), M Ch Sangma (Lumshnong PS, EJH) bad GK Sangma (OC jongka Nongstoin PS, WKH).
Ha ka jingshisha lai ngut ki Pulit Ophisar kiba peit ïa ka Shallang Police Station kiba ha ka kyrdan Sub Inspector ki la shah sospon na ka kam ha ka 2 tarik Rymphang 2023 bad weng pat ïa ka sospon ha ka 11 tarik Jymmang 2023. Kine ki long SI Pearl Talang, SI H Kurbah bad SI Emboklang Sungoh kine ki dei kiba peit ïa ka Shallang PS ha la ka jong ka jongka por.
Ha ka kaiphod u Justice Katakey u la banjur ba dei ban shim rai kloi ka sorkar halor kane ka show cause notice bad ai jingpynsaja ïa kiba donkti. U la ai jingmut ba donkam ruh ban ai jingpynshitom ïa u UBSI Krishna Pawdal uba dei peit ïa ka Shallang PS hi.
U la pynpaw ruh ha ka kaipod ba u AIGP ka tnad pulit uba don lang ha ka jingïalang ha ka 8.9.2023 u la tip ba la dep bthah ba dei ban ithuh ïa baroh ki briew kiba donkti ha kine ki kam tih bad khaïi dewiong beaiñ, kiba pynïeng beaiñ ïa ki coke factory bad dei ban leh ei ei halor jongki kat kum ki kyndon aiñ.