Shillong, Lber, 26: U Myntri Rangbah ka Jylla u Conrad K Sangma u la ong ba ka Sorkar kam pat shim rai eiei ha kaba ïadei bad ka jingpyntreikam ïa ka Green Tax ha ka jylla.
U Sangma u la ong ba ka jingoh khajna ‘green tax’ ïa ki kali kiba la rim kiba la dap 15-20 snem ka don hynrei kan buh ruh jingeh ïa ki paidbah kiba im ha ki shnong nongkyndong ki bym don ïa ka ïoh ka kot kaba biang.
“Ki ri kiba la kiew shaphrang ki lah ban leh ïa kine namarba ka ïoh ka kot jong ki paidbah ka la kiew katba ma ngi pat ngi dang don bun ki jingtynjuh bad namarkata ngin hap ban thew sawar lada shim ïa ka rai ban oh khajna bad ban pynbor ïa ki paidbah ba kin ym pyndonkam shuh ïa ki kali kiba la rim,” u la ong.
“Hynrei kumba nga la ong, ngi hap ban buh jingmut ruh ba ka ïoh ka kot jong ngi bad ki paidbah kiba im hapoh ka jylla jong ngi kim pat poi haduh ka kyrdan kaba ki la kiew ha ka kamai kajih bad kan ym long ruh kaba dei ban shu pyntreikam kum ïa kine ki jinglum khajna kiba heh.” u la ong.
“Kum kine ki jingthmu lehse ha ki katto katne ki bynta jong ka Jylla lehse la lah ban pyntreikam noh hynrei ïa mynta hi ka dang kloi shaba palat ban pyntreikam,” u la ong.
Shuh shuh u Myntri Rangbah u la ong ba ka Sorkar ka la wanrah da kiwei pat ki lad ki lynti ban lum khajna.
