Ym pat rai ka BJP ban jied ïa u kyrtong na Gambegre

Shillong, Nailur 07: Kat haduh mynta ka Bharatiya Janata Party (BJP) kam pat shim ïa ka rai ban jied ïa u kyrtong na ka bynta ka elekshon shiteng samoi ka ban sa long ha Gambegre.
“Ngin dang pyrkhat ban jied ïa u kyrtong ka seng u ban ïakhun ïa kane ka elekshon naba ïa ka tarik elekshon ruh haduh mynta ym pat pynbna satia,” ong u nongïalam ka BJP bad u Myntri ka sorkar jylla u Bah AL Hek sha ki lad pathai khubor ha ka sngi Thohdieng.
Na ka liang jong u ula ong ba napdeng kito kiba la wan sha ka party na ka bynta ka ticket, ka kyrteng u state vice president bad u MDC ba mynta na Tura u Bernard N Marak u la long uba hakhmat eh.
Ka seng kaba la ïalam ïa ka sorkar ka National People’s Party ka la pynïeng da ka kurim u Myntri Rangbah ka jylla ka Mehtab Chandee Sangma, katba ka seng liang pyrshah ka TMC ka la buh ban pynïeng ïa ka MDC na Dengnakpara ka Sadhiarani M Sangma.
Na ka liang ka Congress ka la aiti sha u MP ka Tura u Saleng A Sangma, uba la iehnoh kum u MLA na Gambegre ba un mynjur ïa ka kyrteng u kyrtong khnang ban pynthikna ba ka party kan ïoh bat biang ïa kane ka seat.
Haba kylli, u Bah Hek u la ong ba kano kano ka lah ban jia ha ka election. “Hynrei ngin trei shitom na ka bynta u kyrtong jong ka bad ban pynthikna ban pynkhlaiñ ïa ka party ha kane ka elekshon shiteng samoi,” u la bynrap.