Ym pat ïoh NOC ban pynpoi rel sha Shillong, yn dang ïasyllok bad ki kynhun bapher bapher
Shillong, Lber 24 : U Myntri Rangbah ka Jylla Conrad K Sangma ula pynpaw ba ka Sorkar Meghalaya kam pat ïoh satia ïa ka No Objection Certifictae (NoC) na ka Khasi Hills Autonomous District Council (KHADC) ha kaba ïadei bad ka lynti rel sha Shillong.
U Myntri Rangbah ula pyntip ruh ïa ki lad pathai khubor ba u dang ïakren bad ka Ministry of Railways,Ka Sorkar pdeng, bad kyrpad ba ka donkam ban pynlong shuwa ïa ka jingïasyllok bad ki kynhun bapher bapher shuwa ban shim ïa kano kano ka sienjam.
U Conrad ula ong ba ka jingïakren bad ki Kynhun bapher bapher ka long kaba donkam shuwa ban shim ïa kano kano ka rai halor ka lynti rel sha Shillong. Namar kata, ka Sorkar ka donkam ban ïasyllok bad shim ïa ka jingkyrshan jong ki Kynhun bapher bapher.
U Myntri Rangbah ula ban jur ruh ba donkam ïa ka por ban ïakren ïa kine ki kam bad ki kynhun bad hadien ba ki la poi sha ka jingïabeit lang , ki lah ban pynïaid shakhmat ïa ka kam.
Nalor kane, u Myntri Rangbah ula pyntip ruh ba ha Byrnihat, ki don katto katne ki jingsngewkhia kiba mih bad ka Sorkar Jylla ka dang ïakren bad ki kynhun bapher bapher.
Hynrei, ban kyntiew ïa ka ïoh ka kot ka Jylla, u Myntri Rangbah ula ai jingmut ba ki lah ban sdang shuwa da ki rel kit mar. Kane kan ïarap ïa ka pla tyngka ka Jylla bad ka rel kit mar ka dei kaba lah ban sdang shuwa .
U Myntri Ragbah ula pynpaw ruh ba u Myntri Rangbah Duh Narendra Modi u don ka jingshngewkhia bad u kwah ban ïohi ba baroh ki Nongbah jong ki Jylla kin dei kiba ïasoh da ka lynti rel na ka bynta ka bit ka biang jong ka Ri, ban pynthikna ïa ka jingkiew irat ka ïoh ka kot.
Haba mynjur ïa ki jingmyntoi ban pynïasoh ïa baroh ki Jylla bad ki Nongbah da ka lynti rel, u Myntri Rangbah ula kdew ruh ïa ki jingeh kiba mih ha kawei pa kawei ka Jylla. Ha Meghalaya, ka lynti rel ka dei ka kam kaba jyrwit jyrwat bha bad bun ki Seng bad Khlieh Nongsynshar kila pynpaw ïa ka jingsngewkhia halor ka jingrung kyrthep ki briew ba nabar Jylla. Namar kata, ka long kaba kongsan ban shim shuwa ïa ka jingmynjur lang jong baroh, ula ong.