Ym pat don nongtrei ha C&RD Block Lumshnong kaba la plie mynta la shi snem tam

Khliehriat, K’lyngkot, 28: Ka Jaiñtia National Council, ka pynpaw ka jingsngew khia jur halor ka jingbym ju plie ka ophis C&RD Block kaba don ha Lumshnog, East Jaiñtia Hills District, ka seng hadien ba ka la ïohi lyngba ki pathai khubor halor kane ka jingkhang tala ka ophis Block, mynta ka sngi ka la leit ban ïakynduh ïa u Deputy Commissioner ka East Jaiñtia Hills District, u A.Baranwal,IAS bad ïakren halor kane.
Ha ka jingiakren bad u DC Shri. A. Baranwal, u Information Secretary, ka JNC, u samla Mebanteilang Sukhlaiñ, u la pan ka jingpynshai na u DC ban dup shai bad sngewthuh ba na kaei ka daw ba katei ka ophis C&RD Block ha Lumshnong ka shu khang tala beit bad na ka liang u Deputy Commssioner u la ong ba ka daw ba khang tala katei ka ophis ka dei namar ba ym pat don nongtrei haduh mynta bad ong ba ha katei ka ophis ki dang don mynta tang ar ngut ki chowkidar bad u Engineer bad LDA bad dei ka jingbym ïoh tulop kine ki nongtrei lah kumba 4 ne 5 bnai kumta ka la buh jingeh ïa ki nongtrei ha bai ka leit ka wan namar ki hap ban wan na ki jaka ba jngai kumta ka la pynlong ïa ki ban sangeh wantrei.
“Ka seng ka dap da ka jingsngewkhia haba ïoh sngew ïa kum kata ka apot bad Ka seng ka buh ruh ka jingkylli hato ïa katei ka C&RD Block la wanrah tang namar ba ha kato ka por dei ba la jan ka election? namar kum ban shu pynkynmaw ba ia katei ka Block la plie ha ka 5 Tarik u nohprah 2022 kata hashwa ka election MLA 2023” ong u kyrwoh.
Ha kajuh ka por, ka seng ka pynpaw ka jingsngewnguh ïa ka Kong Santa Mary Shylla, ka MLA Sutnga Saipung, kaba la trei shitom ban wanrah ïa katei ka C&RD block ha Lumshnong, watla ka dang long tang kum ka kyrtong iakhun election ha kato ka por, mynta ka seng ka kyrpad bad kyntu ïa ka MLA, ka kong Santa Mary Shylla ba kan sngewbha leh eiei halor kane namar ba mynta ba la don ha ka bor kum ka nongmihkhmat jong ka thaiñ, kata ruh ha ka liang synshar lane ka ruling Government “Kumba phi lah trei shitom ban wanrah ïa katei ka Block kumjuh ruh phin sngewbha ban trei shitom biang ban pynbit pynbiang bha ïa katei ka Block khnang ba kan nym long kaba shu sepei hynrei kan ai ïa kata ka jingshakri hok kaba paka bad ban theh ruh ïa ki jingmyntoi sha ki paidbah ka thaiñ bad khatduh ruh ka seng ka kyrpad ïa ka MLA ba la dei ka por ban thungkam noh ïa ki nongtrei ha katei ka Block khnang ba ki khun samla wad kam wad jam ka thaiñ Narpuh kin long kiba ïoh jingmyntoi lyngba kane ka Block.