Ki MLA ka Meghalaya ki dei kiba don akor tam kob u Lamphang hakhmat ka jingïalang ka AIPOC

Shillong, K’Lyngkot, 28: U Lamphang jong ka Ingdorbar Thawaiñ ka Jylla u Thomas Sangma u la ïathuh da ka jingsngew sarong ïa ka jingdonakor bad ïa ka burom jong ki nongthawaiñ ka Jylla haba pynlong ïa ki dorbar jong ka Ingdorbar Thawaiñ ka Jylla.
U Lamphang ula pynpaw ïa kane ha ka jingïashim bynta ban ai jingkren ha ka 84th All India Presiding Officers Conference (AIPOC) kaba long ha Maharashtra Legislative Assembly, Mumbai.
Ïa kane ka jingïalang la plie da u Lamphang ka Lok Sabha u Om Birla bad la ïoh ruh ïa ka jingkren na u Myntri Rangbahduh u Narendra Modi lyngba ka kor online.
Ha kane ka jingïalang ki Presiding Officer ki la ïakren halor ka mat (i) ban tei ïa ka jingshaniah na ki paidbah ha ki Iingdorbar Thaw Aiñ, ka jingdonkam ban bat ïa ka jingkohnguh bad ka burom ha Parliament, ha ki Assembly ha ki Jylla bad UT bad (ii) kumno ban pynlong ïa ka jingtreikam jong ki Committee kaba kham don jingmut bad ba trei bha.
Haba kren halor ka mat ban tei ïa ka jingshaniah u paidbah ha ki Iingdorbar Thaw Aiñ bad ka jingdonkam ban bat ïa ka jingdon akor bad ïa ka burom ha Parliament bad Assembly, u Lamphang ula ban jur ba ki dkhot jong ka Parliament bad ki Assembly ki dei ban bat ïa ka akor bad ka burom jong ka Iingdorbar da kaba kohnguh bad ïaid katkum ki Rules bad jingpynïaid dorbar.
“Ban pynkulmar hapoh ka Iingdorbar kam pynitynnad satia hakhmat u paidbah. Ha kine ki sngi ba mynta, ngi la ïohi ïa ki dkhot ba ki ïatur shajan ka jaka shong jong u Lamphang, ban rah placard bad leh pyrshah ïa ka hukum jong u Presiding Officer kaba dei ka kam ka bym itynnad bad ka bym ïahap ruh katkum ka ri synshar paidbah,” ula ong.
U la ai jingmut ïa ki dkhot ba ki lah ban kren ïa ki mat jong ki ha ka lynti kaba dei bad ki lah ruh ban ïakren ïa ki jingeh ba ki don bad ki Presiding Officer shabar jong ka dorbar.
“Hynrei sngewtynnad ba ki jingïatai bad jingïakren hapoh ka Meghalaya Legislative Assembly ka dei kaba ju pynlong beit ha ka lynti kaba jai jai watla ki don ki jingïakhluit ha ki jingïatai nia hynrei ki dkhot ki ju bat beit ïa ka burom jong ka iing,” la ong u Thomas.
“Ngim pat ju mad ïa kano kano ka khep ba ki dkhot ki pynhuri hura ne ïatur sha ka jylli jong ka Iingdorbar da kaba rah plakad hynrei lait noh tang ka jingphet shabar jong ki dkhot haba kim hun ïa kino kino ki mat,” u la bynrap.
U la pyntip ruh ba ki don ki khep ba u Presiding Officer u ju ïakren hapoh kamram bad ki nongïalam na baroh ar liang, ka liang synshar bad ka liang pyrshah, da ka jingthmu ban pynbeit ïa kino kino ki ishu ka ban pynhun lang ïa baroh ki liang manla ba don bynta.