Pynher lama u Ma Sniawbha ha Resubelpara pynbna ba thrang ka sorkar ban kyntiew ïa ka thaiñ

Shillong, Kyllalyngkot 28 : U Symbud Myntri Rangbah ka jylla uba peit ïa ki kam pynroi sor u Ma Sniawbhalang Dhar u la long kum u kongsan ban pynher ïa ka lama ka ri bad shim salute na ki kynhun ba ïaid march past ha Resubelpara ha ka jingrakhe ïa ka Republic Day kaba 75 jongka ri kata ha ka 26 tarik Kyllalyngkot 2024 ha Resubelpara Mini Stadium.
Haba kren ha kane ka jingrakhe burom ïa ka Republic Day u Symbud Myntri Rangbah u la ong ba ka sorkar MDA ka dei ka sorkar kab trei bad shakri hok ïa ki paidbah namar ka don ka jingthrang ba ka jylla Meghalaya kan kiew naduh sor haduh nongkyndong. U la kyntu bad ïawer ïa ki paid nongshong shnong ka jylla ba kin ïatrei lang bad ka sorkar da kaba peit ba ki projek bad ki skhim ba pyntrei ha kano kano ka jaka kin ïaid beit khlem kino kino ki jingpynwit. Namar dei tang ka jingïatrei lang kaba kyntiew kloi ïa ka jylla.
Ban pynphuh pynphieng ïa kane ka sngi hadien ba la dep shim salute ïa ki kynhun ba ïaid march pass la pyni rong ruh ïa ki Tableau jong ki tnad sorkar bapher bapher. Kane ka la pynkhring bha ïa ki paidbah kiba wan sha ka jingrakhe. Ka Ophis Soil and Conservation ka la ïoh ïa ka khusnam Best Tableau. Katba ka Resubelpara RMSA Secondary School ka la ïoh ia ka khusnam kum ka kynhun ba tbit tam ha ka jingïaid Parade ne Best March Past.
Kiwei kiwei ki prokram ba la pyndep ha katei ka sngi ki long ka jingleh burom ïa ki nongtrei sorkar kiba minot thop la ka kam kata Best Employees of the District, ïa ki ASHA, ki nongïalehkai sport bapher bapher khamtam kiba la wanrah burom ïa ka district na ka Meghalaya Games kaba San kaba dang shu kut shen ha nongbah Tura.