Shillong, K’Lyngkot 27: Ka Seng Samla Mawkhar ha ka sngi Saitjaiñ ka la pynhap pyrda ïa ka jingrakhe 25 snem ha ka jingshakri ïa ka shnong ka thaw hapoh ka Dorbar Shnong Mawkhar ryngkat ka jingsakhi lang jong ka Myntri ka tnad ka Koit ka Khiah ka Dr. Mazel Ampareen Lyngdoh kaba la long kum ka Kongsan, u MLA ka North Shillong Constituency Bah Adelbert Nongrum uba la long kum u Symbud Kongsan, u MDC ka Mawkhar-Pynthorumkhrah u Bah Pynshngaiñ N. Syiem u la long kum u kongsan ba kyrpang.
Haba kren kum ka Kongsan ka Dr Ampareen ka la ai khublei ïa ka Seng Samla Mawkhar kaba la jam sha ki 25 tylli ki mawmer da ka jinglah ban tan lem ïa ki heprit bad ïa ki samla jong ka shnong ha ka jingpynlong ïa ki jingïakob bapher bapher ban pynshongshit ïa ka shnong ka thaw.
Ka la ong ruh ba ka ïohi ba ïa ki taïew lehkmen jong ki samla la pynlong tang hashwa ka elekshon hynrei kum ka Nongmihkhmat ka sngew ba dei ban pynshlur ïa ki samla ba kin ïai pynlong ïa ki prokram babha ki ban tei bad wanrah ka jingïajan hapdeng ki nongshong shnong.
“Lada phi lah ban pynlong ïa ki prokram kiba kit jingmut bad ïarap ïa ki samla, long kiba kloi ban wan sha nga ban pan jingïarap na ka bynta ka bha ka miat jong ki samla bad jong ka shnong,” ka la ong.
U Bah Adelbert haba kren kum u Symbud Kongsan u la pynbna ba hadien ka jingai jingkular jong u ïa ka Seng Samla Mawkhar ba un sa ai kaei-kaei ka bha ïa ka shnong bad kumta kane ka jingïaishah bad ka jingap kmang kaba la shisnem kynthih ka la seisoh ha kaba na ka liang jong ka tnad sorkar ka la ai ïa ka mang tyngka kaba T. 1 lak tam kum shibynta ka skhim ai jingïarap ïa ka shnong.
U Bah Pynshngaiñ N.Syiem u la ong, ka shnong Mawkhar ka don shibun ki jingïathuhkhana ban sah kynmaw bad kum ka shnong ka donkam ban dang ïai kiew shajrong ha ki liang baroh.
“Nga dap da ka jingsarong ban long u MDC jong kane ka shnong namarba ka Mawkhar ka dei ka jabieng jong ka Ri Khasi,” u la ong.
Ha kane ka sngi, la sakhi lang da u President ka Seng Samla Mawkhar u Bah Daniel R. Syngai, u President banyngkong ka Seng Samla Mawkhar u Dr. B. PS. Toi, u Rangbah Shnong Bah Arwan Tariang bad kiwei kiwei.
Shwa ban pynkut ïa ka jingrakhe, ka Dr. Ampareen Lyngdoh ka la pyllait paidbah ïa ka Souvenir bad sam ïa ki Momentos sha ki radbah jong ka shnong kiba ju don bynta ha ka jingïakit ïabah ïa ka shnong.
La pynshongkun ïa kane ka sngi, da ki jingrwai, ki jingshad bad ka jingsam ïa ki khusnam na ki nongjop bad ka jingpynhap noh ïa ka lama rakhe jubili.
