Ym pat dei ban sam ïa ki tin sop ïing kat bym aiti ïa ka kaiphod tohkit, ong ka Lokayukta

Shillong, Naitung 02: Ka ophis jong ka Meghalaya Lokayukta ha ka sngi baar la bthah ïa ka tnat Housing ba ka dei ban pynneh ïa ka status quo bad bym pat dei ban sam ïa ki tin sopïing ne ki aluminium roofing sheet sha kiba dei ban ïoh jingmyntoi katkum bym pat aiti ïa ka kaiphod tohkit ha ka 3 tarik u Nailur.
Ha ka hukum, u chairperson ka Lokayukta u Bah Bhalang Dhar u la bthah ïa u Deputy Superintendent of Police (Crime) Bipul Das ban sdang ban tohkit halor kane ka jingkynnoh ba ka don ka jingsam ïa ki tin kiba tatdor bad kiba stang sha ki community & rural development (C&RD) block ha ki 7 tylli ki district jong ka thaiñ Khasi-Jaiñtia.
“Ha ka shithi kaba 28 tarik u Jylliew, ba la ïoh na ka ophis ka Director General of Police Meghalaya ka la phah ïa u Bipul Das, MPS Deputy Superintendent of Police (Crime) sha Lokayukta. Ïa u Bipul Das la bthah ban pynlong ïa ka jingtohkit bad halor ka nongrim jong ki tiar, ki jingtip bad ki kot ki sla ba la lum, ka pan ïa ki jingkynthoh halor ki jingkynnoh ka ba la don hapoh ka complaint form bad dei ban aiti ïa ka kaiphod ha ka 3 tarik u Nailur 2024,” u la ong.
“Halor ki aluminium roofing sheets ne ki tin sopïing kiba don ha ki godown, dei ban pynneh ïa ka status quo bad ym pat dei ban sam ïa ki sha kiba dei ban ïoh jingmyntoi,” ong u Bah Dhar.
Ïa kane ka hukum la pynmih hadien ba la pynlong ïa ka jingbishar ba la ujor bad mudui da u President jong ka Hynñiewtrep Youth Council (HYC) u Bah Roy Kupar Synrem.