Ym kwah shuh ka Kur Syiemïong ba u Bah Kawangbor Syiemïong un dang long Syiem ka Hima Nobosohphoh

Mawkyrwat, Naitung 10: Ka Kur Syiemiong, kaba dei ka Kur Syiem Sad Syiem Sunon jong ka Hima Nobosohphoh Syiemship, ka la pynpaw ba kam kwah shuh ban pdiang ïa ka jingpynkup bor (reinstate) biang ïa u Bah Kawangbor Syiemiong kum u Syiem pura jong ka Hima Nobosohphoh Syiemship da ka Khasi Hills Autonomous District Council (KHADC) ba thymmai kaba ïalam da ka Voice of the People Party (VPP).
Ka Kong Crusy Merry Syiemiong, Finance Secretary jong ka Kur Syiemiong, haba kren sha ki lad pathai khubor ka la ong ba halor kane ka kam, kum ka Kur ka la pynlong ïa ka Dorbar ha ka 7 tarik u Naitung, 2026 ban ïatai sani halor ka jingwanphai biang u Bah Kawangbor Syiemiong kum u Syiem bapura jong ka Hima.
Kumta, katkum ka jingïathuh jong ka ka la ong ba naduh ba u Bah Kawangbor Syiemiong u la shah jied kum u Syiem ha u snem 2007, ka Kur kam shym la sngewtynnad ïa kane ka jingjied namar, katkum ka jingong jong ka Kur, um shong shuh hapoh u pud u sam jong ka Hima Nobosohphoh. Ka la ong ruh ba la kha ïa u ha ki thaiñ Rambrai bad hadien kata u la leit shongkha ha ka shnong Nongkhlaw kaba hap hapoh ka Hima Nongstoin.
Ym tang kata, ka Kong Crusy Merry Syiemiong ka la kynnoh ruh ba naduh ba u la shimti kum u Syiem, ka la don ka jingkynrum-kynram hapoh ka Kur namar ba u la synshar marwei khlem da pyntip ne ïasyllok bad ka Kur ha kiba bun ki kam jong ka Hima. Ka la ong ruh ba wat haba ïadei bad ki kam pisa pilaiñ jong ka Hima ruh ym shym la ju don ka jingpynsngew ne jingïasam jingtip sha ka Kur naduh ba u la long Syiem.
Namarkata, ka Kur Syiemiong ka la kyntu ïa ki khun ki hajar, ki Lyngdoh, ki Myntri bad ki khlieh nongsynshar shnong jong ka Hima Nobosohphoh Syiemship ba kin ïasnohkti lang bad ka Kur Syiemiong, kaba dei ka Kur Syiem Sad Syiem Sunon, ban ïatreilang bad ban ïamynjur lang ba ym dei shuh ban shah ïa u Bah Kawangbor Syiemiong ban shong ha ka khet kum u Syiem jong ka Hima Nobosohphoh Syiemship.