Nongstoiñ, Naitung 10: Ka Hill State People’s Democratic Party (HSPDP) Youth Wing hapoh ka jingïalam jong u samla Korbarlang Syiemlieh kum u President bad u samla Pynshai Joel Dkhar Secretary, ki la leit ban aiti ïa ka dorkhas sha u Myntri ka tnad kam jngohkai pyrthei u Timothy D Shira, ban kyrpad jur ban wanrah lem noh ïa ka Meghalaya Grassroots Music Project (MGMP) hapoh West Khasi Hills District.
Haba ïakren bad u nongthoh khubor, na ka liang jong u samla Pynshai Joel Dkhar Secretary ka HSPDP Youth Wing, u la ong ba ka District West Khasi Hills ka ju pynmih bun bha ki nongrwai nongput nongtem kiba tbit kiba la paw bha kum ka Khmih Creative Society, Kawei Ka Sur, Kids Tarari bad bun bah ki riew dohsap, kiba don ha kylleng ki shnong jong ka District kiba la pynpaw nam ïa ka Jylla lyngba ki jingrwai bad ki dur khih jingrwai ki jong ki.
Hynrei ha ka jinglap jong ki la ong ba ka MGMP kaba dei ban don ha baroh ka Jylla Meghalaya, kam pat poi lane don satia hapoh ka District West Khasi Hills. Halor kane na ka liang jong Youth Wing HSPDP ka la shong ïa ka EC bad ka la rai ban thoh sha u Myntri Rangbha ka Jylla u Conrad K.Sangma bad ruh sha ka tnad kam jngohkai pyrthei ban pynïoh lem noh ïa kane ka MGMP hapoh WKHD.
U samla Pynshai u la ong, “Na ka liang jong ngi ka Youth Wing HSPDP ngi la ap bunsien ban ïoh ïakynduh ïa u Myntri Rangbah hynrei ngi khlem ïoh lad namar ka jingbun kam ka jong u hynrei ngi la leit ïakynduh noh ïa u Myntri ba dei peit ïa ka Tourism u Timothy D Shira ha kaba ngi la ïoh ruh ban aiti ïa ka dorkhas ha u”.
“Ka jingdon jong kane ka MGMP hapoh ka District, kan ïarap ïa ki samla don sap ha ka rwai ka siaw bad ka put ka tem ba kin ïoh ïa ka lad jingïarap ïa kaba kane ka project ka ai ïarap lyngba ki jingsiew kiba la kham bit ha manla ki jingïashim bynta jong ki. Ka lah ban ïarap ruh ban kyrshan hi ïa ki khun samla donsap napoh ka District. Kumta lyngba katei ka dorkhas kaba ngi la ai sha u Myntri, ngi da kyrpad jur ba ka sorkar ka dei ban wanrah lem noh ïa katei ka project MGMP hapoh ka District”, u la ong.
U la ong ruh ba dang shen na ka liang jong ki lyngba ka ‘Ge Thymmei u Muliang Society’, kaba long ka nongbei bad ïarap pisa ban pynlong ïa kawei ka show hapoh Nongpyndeng, ka la khot ïa ki katto katne ki nongrwai bad nongtem nongput napoh ka thaiñ Nongstoiñ ba kin wan ban ïashimbynta.
Hynrei kim da lah pat ban pynlong ïa ka show kaba heh, namar ka jingbym ïoh lad jingïarap pisa na ka sorkar ban pynbit pynbiang ïa ki jingdonkam bad ban ïarap kyrshan pisa ïa ki local artist. Kumta ka MGMP ka long kaba donkam haduh katta katta ban ai mynsiem na ka bynta ki samla don sap.
