Shillong, Nailar, 24: U Symbud Myntri Rangbah ka Jylla u Bah Prestone Tynsong uba peit ruh ïa ka tnat Bording ha ka sngi Balang u la ong ba kam don kano kano ka jingpynkiewdor ha kaba ïadei bad ka jingthmu ban pyndait ïa ki Smart Meters.
U Bah Prestone u la pynshai ïa kane hadien ba u Nongïalam jong ka Liang Pyrshah u Dr. Mukul Sangma dang shen u la thoh sha u Myntri Rangbahduh ka Ri u Narendra Modi ba un tuklar da kaba phah thung ïa ka jingtohkit kaba laitluid ha kaba ïadei bad ka jingthied ha ka dor kaba rem ïa ki Smart Meters da ka Sorkar Meghalaya.
“Kam don kano kano ka jingthied ha ka dor kaba rem. Ïa ka kaiphod ladep aiti da ka Inquiry Committee ba la khlieh da u nongbishar ba la shongthiat bad mynta ka la don bad ka Corporation ha kaba ngi ladep bishar bniah bin pa bin. Ngan ïathuh ïa phi, ha kane ka kaiphod, kam don kano kano ka jingkdew ba la thied rem dor lane kano kano ka jingleh thok katkum ka tender ba ladep khot,” ong u Bah Prestone ha ka jingïakren bad ki lad pathai khubor.
Ha ka 29 tarik, Lber, ïa ka Independent Inquiry Committee ba la khlieh da u Justice (Retd) RN Mishra la aiti sha ka Sorkar ha kaba la tohkit halor ka jingkynnoh ba ka don ka jingpyndonkam bakla ha ka Meghalaya Energy Corporation Limited (MeECL).
“Namar, nga kwah ban ïathuh ïa phi ba kam don kano kano ka ishu bad baroh ki jingthoh jingtar ki don lut nadong shanong bad baroh ki don ha ka rekod bad ngin sa leh ïa kaba dei lada donkam katkum ka jingai jingmut jong ka Committee,” la ong u Bah Prestone.
Haba kdew katkum ka RTI ba la pan da ka HYC halor kane ka kam, u Symbud Myntri Rangbah u la ong, “ki (HYC) ki la bishar lut nadong shadong, ki la leit ruh sha Ophis jong u Director of Distribution bad ha miej ladep pyni lut ïa ki. Baroh ki biang lut nadong shadong. Kam don kano kano ka jingleh thok lane ban thied ha ka dor kaba rem na ka Quotation da ki briew kiba la ïashim bynta ha ka NIT.”
Da kaba kynthoh ba ka ju long ka rukom ba ka Liang Pyrshah kan pynmih ïa kino kino ki jingkynnoh, u Bah Prestone u la ong, “kam da donkam eh ïa u Nongïalam ka Liang Pyrshah ban hap da phah da ka jingthoh sha u Myntri Rangbahduh hynrei lada u sngew donkam u la lah ban pan jingtip halor ki Smart Meters bad u lah hi ruh ban wad jingtip da lade.”
“U (Mukul) lah ban leit ujor shano shano ruh, ngi pdiang sngewbha ïa kata bad ngi ruh ngi pyni lut ïa ki jingshisha baroh, baroh ki kot ki sla ki don lut hangne. Ha ka jingshisha u Nongïalam ka Liang Pyrshah shwa ban un phah ïa ka ujor sha u Narendra Modi balei um lah ban pan lut ïa ki jingshisha dalade. Hato ka don kano kano kaba lah ban buhrieh,” ong u Bah Prestone bad bynrap, ‘wat ka Audit Report ruh ka don bad ngim don jingeh eiei ruh em bad ngam lah ban sngewthuh balei u hap ban da thoh sha u Myntri Rangbahduh ha ka jingshisha u la lah ban shu thoh da ka shithi sha nga lane sha u CMC jong ka MeECL ban ïoh ïa ki kot ki sla baroh.”
