Shillong, Nailar 24 : U Myntri Rangbah ka jylla, Conrad K Sangma ha ka sngi Balang u la pynbna ba ka jylla ka la pynkhreh mynta ba pynlong bun tylli ki tamasa Synrai mynta u snem kaba lada khein kyllum kan poi kumba 12 haduh 15 klur tyngka da ka thong ban khring ïa ki nongwan jngohkai na kylleng ki ri jong ka pyrthei.
Kitei ki tamasa ban pynlong ha kane ka tamasa Synrai ki kynthup naduh ka Megha Kayak Fest, ka Shillong Autumn Festival, ka North East Olympic Games, ka Umïam Boating Regatta, ka Hills Festival, ka International Film Festival bad bun kiwei kiwei kynthup naduh ka Shad Nongkrem bad ka shad Wangala.
Ki tamasa kiba kham shongshit hi ha katei ka lympung kan dei ka tamasa Shillong Cherry Blossom kaba la mang ha ka jinglut kaba kot sha ka 2.5 klur tyngka. Kaba kham heh ïa kane kadei ka North East Olympic Games ha kaba ka jingmang ban pynlut ka la kot sha ka 5 klur tyngka.
Ha kane ka sngi, u Myntri Rangbah u la pynbna ruh ba ha ka 07tarik u Nailur kin sa plie noh ïa ka projek kaba la sahteng da ki phew snem, kata ka Crowborough Hotel ba tip kum ka Taj Vivanta thymmai kaba don ha pdeng jong ka nongbah.
Da kaba kubur ba ka jingwan jong ka khlam ka la ktah haduh katta katta ïa ka jingwan ki nongjngohkai pyrthei sha ka jylla ha kine ki arsnem, u Myntri Rangbah u la ong ruh ba ka kam jngohkai mynta ka la sdang ban kiew stet biang namar ka jylla ka la sakhi ïa ka jingbun bha ki nongwan kai mynta ka kynti.
“Kumta ka long kaba donkam bha ïangi ba ngin lah ban ïoh pura ki jingmyntoi na ka jingwan jong ki, la ka long naduh ki hotel haduh ki nongbuh ïa ki kali ban kit ïa ki nongleit jingleit bad ïa baroh kiba don bynta ha ka kam jngohkai pyrthei,” ong u Myntri Rangbah haba kren bad ki lad pathai khubor.
Nalorkine, u Myntri Rangbah u la pyntip ruh ba ka sorkar jylla ka pynleit jingmut ruh bun bha na ka bynta ban pynbun ïa ki jaka sah pyngad jong ki nongwankai sha kane ka jylla ne ki homestay.
