Shillong, K’Lyngkot 18 : U President ka UDP, Bah Metbah Lyngdoh ba dei ruh u Lamphang ka Ïing Dorbar Thawaiñ ka jylla ha ka sngi Balang u la ong ba baroh ki kyrtong ki donkam ïa ka pisa na ka bynta ban ïakhun ïa ka elekshon hynrei kam mut pat ban pyndonkam ïa ka bor pisa na ka bynta ban thied ïaka hok ki nongthep vote.
Haba kren ha ka jingïalang pdiang burom ïa ki san ngut ki MLA kiba la wan ban pynïasoh noh sha ka UDP hadien ba ki ladep ban resaiñ, u Bah Metbah u la ong, “Baroh ki kyrtong ki donkam ban pynlut pisa ha ka por elekshon bad wat ka Election Commission ruh ka ailad ban pynlut 20 – 25 lak ha ka por elekshon.”
Tangba, u ong pat, “Lada baroh ki kwah ban ïalehkai da ka pisa (por elekshon) shano ka Jaidbynriew jongngi kan poi khamtam ban shu pynlong mar khaïi ïa katei ka kam, ka long kaei kaei kaba sngewsih.”
Da kaba pynpaw ba mynta ki paidbah ka jylla ki la phai khmat lut sha ka UDP, kumta u kyntu ïa ki ba kim dei satia ban shah pynbiej ha kino kino kiban knieh noh pat ïa ka hok jong ki ban jied ïa ki nongmihkhmat.
