Ym da donkam pan jingbit haba leit rung ha ki jaka pule Sorkar Pdeng ne Sorkar Jylla: Prestone

Shillong, Ïaïong 29: U Symbud Myntri Rangbah ka jylla uba khmih ïa ka tnat ki Kam Pohïing (Police) u Bah Prestone Tynsong ha ka sngi baar u la ong ba ka jingpyndonkam bad buh ïa ki pulit hapoh ka campus ka North Eastern Hill University la dep ban wengnoh ha ka mied jong ka sngi Nyngkong hadien ba la dep ban khmih ïa ki jinglong jingman bad da kaba pynpaw ruh ba ki pulit kim da donkam than ban da pan jingbit haba leit rung hapoh ki jaka pule ka sorkar pdeng ne ba pynïaid da ka sorkar jylla.
Haba kren sha ki lad pathai khubor u Bah Tynsong u la ong, “Ngi la dep ban phah mih noh ïa ki pulit napoh ka campus ha ka mied sngi nyngkong hadien ba la dep ban khmih ïa baroh ki jinglong jingman bad kumjuh ruh hadien ba la dep ban ïasyllok bad in-charge jong ka NEHU campus.”
Lah ban ong ba ka NEHUSU ka la pynbna ba kan pynlong da ka jingsangeh ban leit shong klas kaba khlem buh por bad ka la pynlong ruh ka jingïalang bad ka signature campaign pyrshah ka jingshah kem jong u president jong ka u Sandy Sohtun bad ka jingwan buh ïa ki pulit ka bym ju jia mynno mynno hadien ka jingjia shah shoh u assistant professor ka Hindi department u Dr Alok Singh.
Ki samla pule ki la pynrem jur ruh ïa ka tnat pulit ba ka la buh ïa ki pulit khlem da ïoh ka jingmynjur na ki bor ba dei khmih jong ka university.
Haba pan ïa ka jingkynthoh halor kane, u Bah Tynsong u la ong ba kam da donkam than ïa ki pulit ban pan jingbit ban rung hapoh ki jaka ba pynïaid da ka sorkar pdeng ne ki jaka pule ka sorkar jylla namar baroh ka shong ka jinglong jingman jong ka jingjia.
“Kam long kaba donkam ban wad ne pan jingbit lada ka jinglong jingman ka mih kaba ngi hap ban shim ïa ki lad ban ai jingïada. Kumta ngam ïohi satia ba donkam kano kano ka jingpan jingbit kaba ha shwa ba dei ban ai da ka bor ba dei peit bad phi tip bha ba ka sorkar ka sngewkhia bha halor ki jingïada bad ki jingshngaiñ jong baroh khamtam ki samla pule, ki nonghikai bad jong baroh. Namarkata, ngam dei ban ong ba ngi donkam shwa ka jingbit ban rung sha kano kano ka jaka la ka dei ha ka shnong ne ha ki jaka treikam bapher bapher la ka dei jong ka sorkar pdeng ne ka sorkar jylla kumta ka shong ha ka jinglong jingman jong ka jingjia,” u la bynrap.
Ha kajuh ka por u Symbud Myntri Rangbah u la kyntu ïa ki samla pule ban ailad ïa ka jingtohkit halor ka jingjia kaba dangshen ba shah shoh u nonghikai ba yn lah ban pyndep.
“Ngi la dep phah ka khubor kaba shai, ba ngi rah ïa u president ka NEHUSU halor ka nongrim jong ka FIR. Kumta shah ïa ka jingtohkit ban pyndep bad shisien ba la lah ban pyndep haba kut ki la long laitluid ban leit sha ka Ïingbishar bad ka Ïingbishar ha kaba khatduh kan sa shim ïa ka jingpyrkhat kaba khatduh la kan shah ai jamin ne kan ym shah ban ai jamin. Kumta nga kyrpad ïa ka kynhun ki samla ba kin sngewbha ban shah ïa ka jingtohkit ban pyndep pura,” u la ong.
Haba kyntu ïa ki samla pule ban kiar na ka jingshim ïa ka aiñ ha ki kti la jong, u Bah Tynsong u la ong, “Ngim lah ban shim ïa ka aiñ ha la ki kti la jong bad kumba phi tip bad lada ka dei ka jingshisha kaba long katkum ka FIR ba u professor u la shah shoh ha u president ne ha uno uno ruh, kumta ma nga shimet nga sngew ba ngi dei ban pynthikna ba baroh kiba don hangne ha Meghalaya ki dei ban ïoh ki jingïada la ki dei ki lecturer ne ki nongtrei na shabar ka jylla kiba shakri ha ki kam ophis ne kam business hangne bad baroh ki dei ban ïoh ki jingïada.”
“Ka sorkar ka la dep ban peit ïa baroh ki jinglong jingman bad sa shisien pat nga kyrpad ïa ki samla pule ban ïaishah bad ngi bad ban shah ïa ka aiñ ba kan pyndep ïa ki kam bad shisien ba la pyndep ïa ka jingtohkit, ka Ïingbishar kan sa shimti ban pyndep ïa la ka jong ka bynta,” u la bynrap.